Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 626 Hüküm no: 778 Orijinal metin no: [139b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul Patriği Diyonisyos’un borçlarını taksitle ödemesi fermanı İstanbul kadısı izzetlü ve fazîletlü Efendi hazretleri İstanbul ve tevâbi‘i keferesi patriği olan Diyonisyos râhib Ordu-yı hümâyûnuma arzuhâl edip patriklik husûsiyçün istidâne edip aldığı akçeyi sâhiblerine mukaddem bi’t-tamâm edâ etmedikçe mukaddemâ tedrîc ile edâ olunmak üzre istikrâz olunan akçeler için kendiye ve kefîl bi’l-mâl olan metrepolidleri rencîde ettirilmeyip hâlâ istikrâz eyledikleri akçeler ashâbına edâ olundukdan sonra eski borçları dahi tedrîc ile edâ eyleyeler deyû emr-i şerîf verilmek üzre istid‘â-yı inâyet eyledikde vech-i meşrûh üzre Ordu-yı hümâyûnun mâliye tarafından emr-i şerîf-i âlîşân verilmeğin mûcebince amel olunup emr-i şerîfden tasrîh olunan vech-i meşrûha mugāyir râhib-i mezbûru kefîl bi’l-mâl olan metrepolidlerini bir ferde rencîde ve remîde ettirmeyesiz deyû buyruldu. 29 C[emâziyelâhir] sene [10]97. Düstûr-ı mükerrem müşîr-i müfahham nizâmü’l-âlem müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-sa‘âdeti ve’l-iclâl, el-mahfûfu bi sunûfi avâtıfi’l-meliki’l-a‘lâ Âsitâne-i sa‘âdetimden sadâret-i uzmâ ve vekâlet-i kübrâ kāimmakāmı olan vezîrim Receb Paşa -edâmallâhu te‘âlâ iclâlehû- ve akzâ kuzâti’l-müslimîn evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîde fezâilühû- tevkī‘-i refî‘-i hümâyûn vâsıl olucak ma‘lûm ola ki hâlâ İstanbul ve tevâbi‘i patriği olan Diyonisyos nâm râhib Dersa‘âdet’ime arzuhâl edip hâlâ patriklik husûsiyçün istidâne edip aldığı akçeyi sâhiblerine mukaddem bi’t-tamâm edâ etmedikçe mukaddemâ tedrîc ile edâ olunmak üzre istikrâz olunan akçeler için kendiye ve kefîl bi’l-mâl olan metrepolidleri rencîde ettirilmeyip hâlâ istikrâz olunan akçeler ashâbına edâ olundukdan sonra eski borçlar dahi tedrîc ile edâ olunmak bâbında emr-i şerîfim verilmek recâ eylemeğin mûcebince amel olunmak fermânım olmuşdur. Buyurdum ki hükm-i şerîfimle vardıkda bu bâbda sâdır olan fermân-ı âlîşânım mûcebince amel edip dahi patrik-i mezbûr hâlâ patriklik husûsiyçün istikrâz eylediği akçeleri ashâbına mukaddem bi’t-tamâm edâ ettirdip ba‘dehû mukaddemâ tedrîc ile edâ olunmak üzre istikrâz olunan akçeleri dahi tedrîc ile edâ ettirdip mukaddemâ olan tedrîc ile edâsı lâzım gelen akçelerin ashâbını biz akçemizi mukaddem alırız deyû hilâf-ı emr-i şerîf patrik-i mesfûru ve kefîl bi’l-mâl olan metrepolidleri kimesneye rencîde ve remîde ettirmeyesiz husûs-ı mezbûr için emr-i âhar irsâline muhtâc eylemeyesiz şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sânî min şehri Cemâziyelâhir sene seb‘a ve tis‘în ve elf. Be yurd-ı sahrâ-yı Edirne.