Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 387 Hüküm no: 270 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un vefat eden Sarraf Beşir’deki rehin eşya bedelinden kalan alacağının beytülmâlde olan terekesinden ödenmesi Mahmiye-i İstanbul’da Kâtibkasım mahallesinde sâkin iken bundan akdem vefât eden Sarrâf el-Hâc Beşir b. Abdullah b. Abdurrahman’ın zâhirde vâris-i ma‘rûfu olmamağla mecmû‘-ı terekesi cânib-i beytülmâle âid oldukdan sonra mahmiye-i mezbûrede Davudpaşa mahallesinde sâkin bundan akdem vefât eden Mehmed Beşe b. Abdullah’ın sagīre kızı Hadîce’nin tesviye-i umûruna kıbel-i şer‘den vasiye-i mansûbesi ve müteveffâ-yı mezbûrun mu‘takası ve ümm-i veledi işbu râfi‘atü’l-kitâb Saliha Hatun bt. Abdullah meclis-i şer‘de mahmiye-i mezbûrede bi’l-fi‘il yeniçeri beytülmâlcisi olan el-Hâc Hüseyin Ağa b. Receb b. Abdullah’ın tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn olmağla terekesine vaz‘-ı yed eden Ahmed Ağa b. Nasuh mahzarında üzerine bi’l-vesâye da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah kızı sagīre-i mezbûre Hadîce’nin beher miskāli üçer guruş semenli on beş miskāl altın zincir ile bir mikdâr yan zehrini? târîh-i terkîmden yedi ay mukaddem müteveffâ-yı mezbûrdan ikrâz eylediğim beş guruş mukābelesinde rehin vaz‘ ve teslîm etmiş idim el-hâletü hâzihi mezbûr el-Hâc Beşir rehn-i mezbûru mücehhelen vefât etmekle deyn-i merkūm beş guruş sâkıt olup mârrü’z-zikr zincirin kıymetinden bâkī kalan kırk guruşu vekîl-i merkūmun yedinde olan terekesinden taleb ederim suâl olunup alıverilmesi matlûbumdur dedikde gıbbe’s-suâl vekîl-i merkūm cevâbında zevc-i mücehhel terekesine vaz‘-ı yedini ikrâr etmeğin müdde‘iye-i mezbûrenin müdde‘âsını inkâr edicek müdde‘iye-i mezbûre yine [mezbûreden] sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahmiye-i mezbûrede Kasab İlyas mahallesinde sâkin Ali Çelebi b. Yusuf ve Kürkçü mahallesinde sâkin Ahmed b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka târîh-i rakīmden yedi ay mukaddem işbu sagīre-i mezbûre Hadîce’nin vâlidesi mezbûre Saliha müteveffâ-yı mezbûr Sarrâf el-Hâc Beşir b. Abdullah b. Abdurrahman yedinden iktirâz ve kabz eylediği beş guruş mukābelesinde yedi miskālli üçer guruş kıymetli on beş miskāl altın zincir ile bir mikdâr yan zehri? rehin olmak üzere bizim huzûrumuzda vaz‘ ve teslîm eyleyip ol dahi ba‘de’l-kabz mücehhelen vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra ba‘de’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Rebî‘ülevvel sene 1110 Şuhûdü’l-hâl: Mukayyid Mustafa Efendi, Osman Çelebi b. Hasan, el-Hâc Süleyman Çukadâr, Nasuh b. Abdullah, Ahmed Çelebi b. Abdullah ve gayruhum.