Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 399 Hüküm no: 284 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefat eden kocası Hasan Bey’de olan mehir bedeliyle miras hissesini terekeden aldığı Kezâlik akd-i meclis-i şer‘-i şerîf ettikde müteveffânın zevcesi olup zâtı ta‘rîf-i şer‘î ile mu‘arrefe olan bâ‘isetü’l-vesîka Emine Hatun bt. Abdullah meclis-i ma‘kūd-ı mezbûrda müteveffâ-yı mezbûrun evlâd-ı sıgārının tesviye-i emrlerine tashîhan li’d-da‘vâ vasî nasb olunan mahmiye-i mezbûrede Elvanzâde mahallesinde sâkin el-Hâc Veli Ağa b. Kadri mahzarında üzerine da‘vâ ve takrîr-i kelâm edip mezbûr Hasan Bey b. Abdullah b. Abdullah târîh-i fevtinden dört sene mukaddem tezevvüc murâd ettikde beni altı bin sağ akçe mehr-i müeccel tesmiyesiyle şuhûd mahzarlarında tezevvüc ve kabûl edip akd-i nikâh beynimizde bu vechile kāim iken kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden mu‘arrifân-ı mezbûrân Halil Efendi b. Ahmed ve Mustafa Bey b. Ömer li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka mezbûr Hasan Bey b. Abdullah b. Abdullah târîh-i fevtinden dört sene mukaddem tezevvüc murâd ettikde işbu müdde‘iye-i mezbûre Emine Hatun bt. Abdullah’ı altı bin sağ akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde bu vechile kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm müdde‘iye-i mezbûre Emine meclis-i mezbûrda merkūm el-Hâc Veli Ağa muvâcehesinde ikrâr ve takrîr-i kelâm edip ânifen bana edâsına hükm-i şer‘î lâhık olan altı bin sağ akçe mehr-i müeccel hakkımı ve ba‘de ihrâci’l-mesârif ve’d-düyûn ve’s-sülüs defter-i kassâm-ı askerî nâtık olduğu üzere nısf-ı sümün hisseme isâbet eden para dört hesâbı üzere otuz bin altı yüz yirmi altı akçe [73b] hakkımı terekeden olmak üzere mezbûr el-Hâc Veli Ağa yedinden alıp kabz eyledim meblağayn-ı mezbûreynden yedinde bir akçe kalmadı dedikde gıbbe’t-tasdîk vâki‘ hâli ilâ-âhirihî. Şuhûdü’l-hâl: Es-sâbikūn.