Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 399 Hüküm no: 285 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey’in vefat eden Hasan Bey’de alacağı olduğunu ispat ettiği Kezâlik akd-i meclis-i şer‘-i şerîf ettikde Hadîka-i hâssa-i şehriyârî’de sâkin fahrü’l-a‘yân işbu hâfızü’l-kitâb İsmail Bey b. İbrahim meclis-i ma‘kūd-ı mezbûrda vasiyy-i mezbûr el-Hâc Veli Ağa mahzarında üzerine da‘vâ ve takrîr-i kelâm edip müteveffâ-yı mezbûr Hasan Bey b. Abdullah b. Abdullah zimmetinde cihet-i karzdan elli guruş hakkım olup hattâ müteveffâ-yı mezbûr hâl-i hayâtında meblağ-ı mezbûru kendi mesârifine sarfla istihlâk edip meblağ-ı mezbûr cihet-i merkūmeden bana vâcibü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûrda sâkin Murtaza Bey b. Abdullah ve hadîka-i mezkûrede sâkin Abdurrahman Bey b. Ahmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hasan Bey b. Abdullah b. Abdullah hayâtında müdde‘î-i mezbûr İsmail Bey b. İbrahim’e cihet-i karzdan zimmetimde vâcibü’l-edâ elli guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli ilâ-âhirihî. Şuhûdü’l-hâl: Es-sâbikūn.