Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 401 Hüküm no: 287 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leh asıllı köle Mehmed’in hür olduğunu ispat ettiği Husûs-ı âti’l-beyânın mahallinde istimâ‘ ve tahrîri içün bi’l-iltimâs kıbel-i şer‘-i enverden me’zûnen irsâl olunan Mevlânâ Ali Efendi b. Abdüllatif mahmiye-i İstanbul’da Kasab İvaz mahallesinde sâkin fahrü’l-a‘yân el-Hâc Ömer b. el-Hâc İbrahim’in menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i şerîf ettikde mahalle-i mezbûrda sâkin iken bundan akdem vefât eden el-Hâc Ebubekir b. Salih b. Göçeri’nin verâseti zevce-i menkûha-i metrûkesi Fâtıma Hatun bt. Abdullah ile li-ebeveyn karındaşları olup Vilâyet-i Anadolu’da Karahisar sancağına tâbi‘ Akin nâm karyede sâkine Ümmühani ve Âişe ve Huriye nâm hatunlar ile li-ebeveyn ammi oğlu Mustafa b. Mehmed’e münhasıra oldukdan sonra müteveffâ-yı mezbûrun vech-i âtî üzere tedbîr-i mutlak ile müdebber olduğunu iddi‘â eden işbu orta boylu sarı elâ gözlü sarı bıyıklı Lehiyyü’l-asl Müslimü’l-mille hâfızü’l-kitâb Mehmed b. Abdullah meclis-i ma‘kūd-ı mezkûrda müteveffâ-yı mezbûrun diyâr-ı âharda olan veresesinin hisse-i irsiyelerini ahz u kabz ve kendilere îsâle bâ-hüccet-i şer‘iyye vasiyy-i muhtârı olmağla terekesine vaz‘-ı yed eden mezbûr el-Hâc Ömer Ağa mahzarında üzerine da‘vâ ve takrîr-i kelâm edip seyyidim müteveffâ-yı mezbûr el-Hâc Ebubekir b. Salih b. Göçeri’nin ben memlûkü iken fevtinden bir sene mukaddem beni fevtinden sonra âzâd olmak üzere tedbîr-i mutlak ile huzûr-ı Müslimînde müdebber edip ba‘de vefâtihî terekesinin sülüsü benim fetâ kıymetimin sülüsânı olan üç bin yedi yüz yirmi sağ akçeye müsâ‘id olmayıp meblağ-ı mezbûru ben verese-i mezbûrûna si‘âyeten râzı olmağla sâir ahrâr-ı asliyyîn gibi ba‘de’s-si‘âye hür ve’l-miskîn vasiyy-i mezbûr bana rık olup terekeden olmak zu‘muyla bi-gayr-ı hakkın vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında terekeye vech-i muharrer üzere vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden Müezzin Mehmed Efendi b. Yusuf ve el-Hâc Ebubekir Odabaşı b. Hasan ve el-Hâc Mustafa b. Hasan li-ecli’ş-şehâde [74a] meclis-i ma‘kūd-ı mezkûra hâzırûn olup isre’l-istişhâd fi’l-hakīka müteveffâ-yı mezbûr el-Hâc Ebubekir b. Salih b. Göçeri fevtinden bir sene mukaddem işbu müdde‘î-i mezbûr Mehmed b. Abdullah mülkünde iken fevtinden sonra âzâd olmak üzere huzûrumuzda tedbîr-i mutlak ile müdebber edip ba‘de vefâtihî terekesinin sülüsü fetâ kıymetinin sülüsânı olan üç bin yedi yüz yirmi akçeye müsâ‘id olmamağla meblağ-ı mezbûru müdde‘î-i merkūm Mehmed’den vasiyy-i mezbûr içün hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vasiyy-i mezbûr el-Hâc Ömer Ağa ve zâtı ta‘rîf- işer ile mu‘arrefe olan mezbûre Fâtıma meclis-i ma‘kūd-ı mezkûrda mevsûf-ı mezbûr Mehmed b. Abdullah mahzarında her biri vesâyeten ve asâleten ikrâr ve takrîr-i kelâm edip mezbûr Mehmed’e edâsı lâzım gelen üç bin yedi yüz yirmi sağ akçe mal-ı si‘âyeti her birimiz bi-kadri’l-hısâs mezbûr Mehmed yedinden tamâmen ahz u kabz eyledik meblağ-ı mezbûrdan yedinde bir şey kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ma‘an mürsel İbrahim Çelebi b. Mehmed ve Hasan b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Rebî‘ülevvel sene 1110 Şuhûdü’l-hâl: Mehmed Efendi b. Mustafa el-İmâm, el-Hâc Hüseyin b. Abdullah, Mehmed Efendi b. Ahmed, Ahmed Çelebi b. Hüseyin, Musa Çelebi b. Ramazan, Mehmed Çelebi b. İsmail, Mehmed Ağa b. Ömer, el-Hâc Ali b. Abdullah, Süleyman Beşe b. Abdullah ve gayruhum.