Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 407 Hüküm no: 293 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Ağa Çavuş karyesindeki çiftliğini müştemilatıyla birlikte Ümmühani Hatun’a sattığı Husûs-ı âti’z-zikrin mahallinde ketb ü tahrîri iltimâs olunmağın cânib-i şerî‘at-i garrâdan ba‘s olunan Mevlânâ Mehmed Efendi b. Mahmud Dârü’l-hilâfeti’l-aliyye Kostantıniyyetü’l-mahmiye mahallâtından Demirkapı kurbünde Dâye Hatun mahallesinde umdetü’l-muhadderât el-Hacce Ümmühani Hatun bt. Abdullah b. Abdülmennan’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mahmiye-i mezbûrede Laleliçeşme kurbünde Çakır Ağa mahallesinde sâkin fahrü’l-akrân el-Hâc Ebubekir Ağa b. Abdurrahman meclis-i ma‘kūd-ı mezkûrda mûmâ-ileyhâ el-Hacce Ümmühani Hatun tarafından husûs-ı âti’l-beyânda vekîl olduğu zâtı ma‘rifet-i şer‘iyye ile ârifân umdetü’l-havâs ve’l-mukarrebîn sâbıkā Saray-ı cedîd-i şehriyârî ağası olan zevci Hüseyin Ağa b. Ahmed <<…? şer‘iyye>> ve etbâ‘ından Mehmed Bey b. Mustafa şehâdetleriyle hasm-ı şer‘-i câhid mahzarında sâbit olan fahrü’l-akrân Mustafa Ağa b. Ali muvâcehesinde bi’t-tav‘i’s-sâf ikrâr u i‘tirâf edip akd-i âtî sudûruna değin yedimde mülk ve hakkım olup Havâss-ı Refî‘a kazâsına tâbi‘ Çavuş nâm karyede vâki‘ lede’l-ahâlî ve’l-cîrân ma‘lûmü’l-hudûd dâhilen ve hâricen büyût-ı adîdeyi ve ahırlar ve üç tarafı sundurmalı ve üstü on iki gözlü mahsûl anbârlı ve matbah ve iki fırın ve su kuyusu ve mecrâsı ile dört masura mâ-i cârîyi muhtevî çiftlik ta‘bîr olunur mülk menzilimi ve ona muttasıl olan on dönüm kürûmî mülk bağım ile kurbünde vâki‘ bir dönüm mikdârı mülteffetü’l-eşcâr mülk bahçe ve ona muttasıl ma‘lûmü’l-mikdâr koru ve bağa muttasıl arpalık ta‘bîr olunur eşcâr-ı müsmire ve gayr-ı müsmireyi müştemil bahçe ve sulu çayır ile çiftlik-i mezbûr içinde mevcûd mecmû‘u elli re’s olmak üzere yedi re’s manda düvesi ve beş re’s sağılır kara sığır ineği ve altı re’s sağılır manda ineği ve dört re’s manda tosunu ve bir re’s buzağılı manda ineği ve iki re’s manda öküzü ve dört re’s kara sığır öküzü ve üç re’s kara sığır tosunu ve bir re’s kara sığır bogasi ve üç re’s kara sığır düvesi ve beş re’s malak ve altı re’s kara sığır bogasi ve iki re’s kısrak ve iki re’s tay ve yüz elli keyl hınta ve otuz keyl şa‘îr ve yirmi beş keyl darı ve yüz keyl alef ve üç yüz keyl kantar saman ve on beş araba otluk ve evân-ı nühâsiye ve gayrı nühâsiye ve sâir tecemmülât-ı menzil ve âlât-ı zirâ‘at ve harâsetini cemî‘ tevâbi‘ ve levâhıkı ve kâffe-i menâfi‘ ve merâfıkı ile tarafeynden îcâb ve kabûlu hâvî şurût-ı müfsideden ârî bey‘-i bâtt-ı sahîh-i şer‘î ile safaka-i vâhide ile vekîl-i mezbûra bin beş yüz guruşa <> bey‘ ve temlîk ol dahi müvekkile-i mûmâ-ileyhânın malı ile onun içün iştirâ ve temellük ve kabûl edip semeni olan meblağ-ı merkūm bin beş yüz guruşu vekîl-i mezbûr yedinden bi’t-tamâm ve’l-kemâl ahz u kabz ve meblağ-ı mezbûru mahallinde kabza vekîl-i mezbûru taslît eylediğimden sonra çiftlik-i mezbûr ile bu âna değin tasarrufumda olan ma‘lûmü’l-hudûd ve’l-kıt‘a vakıf tarlalarımı ma‘rifet-i mütevellî ile iki yüz guruş bedel mukābelesinde vekîl-i mezbûra ferâğ ve tefv[î]z ol dahi müvekkilesi mûmâ-ileyhâ içün tefevvüz ve kabûl edip bedel-i ferâğ olan meblağ-ı merkūm iki yüz guruşu dahi vekîl-i mezbûr yedinden tamâmen ahz u kabz eyledim ba‘de’l-yevm çiftlik-i mezbûr ber-vech-i muharrer müvekkile-i mûmâ-ileyhânın mülk-i müşterâsı ve arâzi-yi merkūme hakk-ı müfevvezi olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Mehmed b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebî‘i’l-evvel li-seneti aşer ve mi’ete ve elf. Şuhûdü’l-hâl: Fahrü’l-eşbâh Mehmed Ağa b. Ali der-mahalle-i Hayarpaşa, el-Hâc İsmail b. Himmet der-mahalle-i mezbûre, Abdurrahman Çelebi b. Musa, Mehmed Ağa b. Osman, İbrahim Ağa b. Mehmed, Abdulkadir Efendi b. Mehmed, el-Hâc Ali b. Ahmed, es-Seyyid Halil Efendi b. Mustafa Efendi, es-Seyyid Süleyman Efendi b. Mustafa Efendi.