Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 408 Hüküm no: 294 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yusuf’un Dergâh-ı âlî Yeniçerilerinin On Birinci Bölük Odasının Para Vakfı’na olan borcunun terekesinden ödenmesi Dergâh-ı âlî yeniçerilerinin on birinci bölük odası nukūd-ı mevkūfesine bi’l-fi‘il mütevellî olan bâ‘isü’l-kitâb Mustafa Beşe b. Hasan mahfil-i kazâda mahmiye-i İstanbul’da Servi mahallesinde sâkin bundan akdem vefât eden el-Hâc Yusuf b. Abdullah b. Abdullah’ın zevc-i menkûha-i metrûkesi ve evlâd-ı sıgārının tesviye-i emrlerine vasiye-i mansûbeleri olmağla terekesine vaz‘-ı yed edip zâtı ta‘rîf-i şer‘î ile mu‘arrefe olan Safiye Hatun bt. Abdullah mahzarında da‘vâ ve takrîr-i kelâm edip müteveffâ-yı mezbûr el-Hâc Yusuf b. Abdullah b. Abdullah’a bin yüz on Muharremi gurresinde asıl mal-ı vakf-ı mezbûrdan otuz guruş idâne ve teslîm ol dahi istidâne ve kabz edip hattâ hâl-i kemâl-i sıhhatinde cihet-i mezbûreden cânib-i vakf-ı mezbûra ol kadar guruş deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline muvâfık beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Denizabdal mahallesinde sâkin Hüseyin Çelebi b. Abdullah ve Şeyh Ebulvefâ mahallesinde sâkin Ömer Çelebi b. Abdi li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Yusuf b. Abdullah b. Abdullah hâl-i kemâl-i sıhhatinde cânib-i vakf-ı mezbûra mütevellî-i mezbûr Mustafa Beşe yedinden istidâne ve kabz eylediğim otuz guruş cihet-i mezbûreden zimmetimde edâsı vâcib deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyleyip gıbbe’t-ta‘dîl ve’t-tezkiye şehâdetleri makbûle oldukdan sonra gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Hurrire fi’l-yevmi’l-hâmis aşer min-şehri Rebî‘i’l-evvel li-seneti aşer ve mi’e ve elf. Şuhûdü’l-hâl: Mukayyed Mustafa Efendi b. Mehmed, Yahya Efendi b. Mustafa, Hasan Çelebi b. Abdullah, Ahmed Çelebi b. Süleyman, İbrahim Çelebi b. Mehmed.