Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 410 Hüküm no: 296 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin vefat eden Mehmed Hıfzı Efendi’nin ve çocuklarının vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen ba‘s olunan Ahmed Efendi b. el-merhûm Mustafa Efendi mahmiye-i İstanbul’da Haraccı Muhyiddin mahallesi ahâlîsinden iken bundan akdem vefât eden Mehmed Hıfzî Efendi b. Ahmed b. Osman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun vech-i âtî üzere vesâyetini tenfîze vasiyy-i muhtârı olduğunu iddi‘â eden karındaşı oğlu bâ‘isü’l-kitâb Süleyman Çelebi b. Osman meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi Şerife Fâtıma bt. Ali [b.] Abdurrahman tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Yahya Çelebi b. Abdullah ve İbrahim Çelebi b. Abdurrahman şehâdetleriyle sâbit ve sübût-ı vekâletine hükm-i şer‘î lâhık olan Mustafa Ağa b. Mehmed mahzarında üzerine da‘vâ ve takrîr-i kelâm edip ammim müteveffâ-yı mezbûr fevtinden kırk gün mukaddem hasta ve alîl iken bi-emrillâhi te‘âlâ vefât eylediğimde vech-i mesnûn üzere levâzım-ı techîz ve tekfînim görü[l]dükden sonra bâkī terekemin sülüsünden altmış guruş ifrâz olunup iskāt-ı salât ve eyyâm-ı mu‘tâdede tabh-ı ta‘âm ve it‘âm-ı fukarâ oluna ve evlâd-ı sıgārı İbrahim ve Süleyman’ın tesviye-i emrlerine huzûr-ı Müslimînde beni vasiyy-i muhtâr nasb ve ihtiyâr eyledikde ben dahi muvâcehesinde kabûl eylediğimden sonra musırran-aleyhâ vefât etmekle tenfîz-i vesâyet murâd eylediğimde müvekkile-i mezbûre Şerife Fâtıma mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden fahrü’l-kuzât Abdullah Efendi b. el-Hâc (…) mu‘arrif-i mezbûr Yahya Çelebi b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Hıfzî Efendi b. Ahmed b. Osman fevtinden kırk gün mukaddem hasta ve alîl <> iken bi-emrillâhi te‘âlâ vefât eylediğimde vech-i mesnûn üzere levâzım-ı techîz ve tekfînim görü[l]dükden sonra bâkī terekemin sülüsünden altmış guruş ifrâz olunup iskāt-ı salât <> ve eyyâm-ı mu‘tâde[de] tabh-ı ta‘âm ve it‘âm-ı fukarâ oluna ve sagīr oğullarım İbrahim ve Süleyman’ın tesviye-i emrlerine karındaşım oğlu mezbûr Süleyman Çelebi’yi vasiyy-i muhtâr nasb ve ihtiyâr eyledim deyü bizim huzûrumuzda vasiyet edip ol dahi ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mezbûr Ahmed Efendi mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Abdurrahman ve İbrahim Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘i’l-evvel li-seneti aşer ve mi’e ve elf. Şuhûdü’l-hâl: Fahrü’l-akrân Ahmed Efendi, Fahrü’l-müderrisîn Ahmed Efendi b. İsmail, el-Hâc Mehmed b. İbrahim, İbrahim Beşe b. Abdullah, Receb Ağa b. Hüseyin ve gayruhum.