Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 411 Hüküm no: 297 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe vefat eden Yusuf’da alacağı olduğunu ispat ettiği Mahmiye-i İstanbul’da Şeyh Ebulvefâ mahallesinde sâkin hâfızü’l-kitâb Mustafa Beşe b. Hasan mahfil-i kazâda mahmiye-i mezbûre[de] Servi mahallesinde sâkin [iken] fevt olan el-Hâc Yusuf b. Abdullah b. [Abdu]llah’ın zevce-i menkûhası ve evlâd-ı sıgārının vasiye-i mansûbesi olmağla terekesine vaz‘-ı yed edip zâtı ta‘rîf-i şer‘î ile mu‘arrefe olan Safiye Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Yusuf’a târîh-i rakīmden sekiz ay mukaddem bir sîm üsküfümü âhara bey‘ etmek içün verip ol dahi yirmi beş guruşa bey‘ ve semenini mesârifine sarfla istihlâk etmekle bana deyni olduğunu fevtinden bir ay mukaddem huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Şeyh Ebulvefâ mahallesinde sâkin Ömer Çelebi b. Abdi ve Mehmed Beşe b. Mustafa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Yusuf b. Abdullah b. Abdullah fevtinden bir ay mukaddem müdde‘î-i mezbûr Mustafa Beşe’ye cihet-i mezbûreden yirmi beş guruş vâcibü’l-edâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâmis aşer min-Rebî‘ülevvel sene 1[1]10 Şuhûdü’l-hâl: Mehmed Beşe b. Hasan, Hüseyin b. Abdullah, Hasan Çelebi [b.] Abdullah, Ahmed Çelebi b. Süleyman.