Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 424 Hüküm no: 307 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın varislerinden Kerime’nin miras hissesini teslim aldığı Husûs-ı âti’l-beyânın mahallinde tahrîri içün savb-ı şer‘-i enverden bi’t-taleb me’zûnen irsâl olunan Mevlânâ Yahya Efendi b. el-merhûm Mustafa Efendi mahmiye-i İstanbul’da Vâlide Hanı’nda fahrü’t-tüccâr el-Hâc Veliyüddin Ağa b. Süleyman’ın odasına varıp zeyl-i kitâbda mastûrü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Sekbanbaşı İbrahim Ağa mahallesi ahâlîsinden olup bundan akdem Mekke-i mükerreme’de vefât eden merhûm el-Hâc Mustafa b. İsmail’in verâseti zevce-i menkûha-i metrûkesi Emetullah Hatun bt. Yahya’ya ve li-ebeveyn kız karındaşı Kerime Hatun’a münhasıra ve tashîh-i meselesi dört sehmden olmağla sihâm-ı mezbûrenin bir sehmi mezbûre Emetullah Hatun’a ve üç sehmi farzen ve redden mezbûre Kerime Hatun’a isâbeti tahakkukundan sonra mezbûre Kerime Hatun bt. el-mezbûr İsmail b. Ebubekir tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre sükkânından İbrahim Beşe b. İsa ve es-Seyyid Mehmed b. Yahya şehâdetleriyle şer‘an sâbit ve sübût-ı vekâletine hükm-i şer‘î lâhık olan mezbûr el-Hâc Veliyüddin Ağa meclis-i ma‘kūd-ı mezbûrda hâfızü’l-kitâb Mehmed Çelebi b. Hüseyin mahzarında bi’l-vekâle ikrâr ve takrîr-i kelâm edip müteveffâ-yı mezbûr el-Hâc Mustafa bin yüz seksen senesi Şa‘bâni’l-mu‘azzamı gurresinde Mekke-i mükerreme’ye gider oldukda mezbûr Mehmed Çelebi’yi işbu yedimde olan defter mûcebince zimem-i nâsda olan hukūkunu ahz ve akārâtı icârelerini kabza ve bi’l-cümle umûruna vekîl nasb edip ol dahi ba‘de’l-kabûl merhûm-ı mezbûrun medyûnlarından el-Hâc Mustafa nâm kimesneden üç bin yirmi beş guruş ve İbrahim Ağa’dan dokuz yüz yedi guruş ve Elisa zimmîden elli guruş ve Hasan Çelebi’den doksan guruş ve Hüseyin Çelebi’den yüz elli beş guruş ve Muharrem’den iki yüz kırk guruş ve Süleyman’dan elli beş guruş ve el-Hâc Musa’dan seksen guruş ve Örücü Ali’den on guruş ve Abdi Çelebi’den kırk guruş ve el-Hâc Mustafa’dan yüz guruş, Râbia’dan yüz kırk beş guruş ve Şahin Odabaşı’dan üç guruş ve üç rub‘ ve Emir Çelebi’den yetmiş beş guruş ve Alagöz zimmîden dört buçuk guruş ve Abdullah’dan bir guruş ve Moralı el-Hâc Hüseyin’den elli guruş ve Abdurrahimzâde’den iki yüz bir buçuk guruş ve el-Hâc Ahmed’den iki yüz otuz dokuz guruş ve Muharrem oğlundan dört yüz kırk beş guruş ve Haşmetzâde Abdi Efendi’den doksan üç guruş cem‘an altı bin kırk dokuz guruş ve üç rub‘ ile târîh-i mezbûrdan bin yüz on senesi Saferi gāyesine gelince on dokuz ayda mevâzi‘-i müte‘addide vâki‘ akārât icârâtından dahi dört yüz otuz beş buçuk guruş kabz edip min-haysü’l-mecmû‘ altı bin dört yüz seksen beş guruş bir rub‘ guruşdan iki yüz seksen guruşu ber-mûceb-i defter mezbûr mesârif-i ma‘lûmesine sarf edip ve sekiz yüz seksen beş guruşu merhûm-ı mezbûrun kızı ile Sarrâf Gazel zimmî ile ve üç yüz kırk altı buçuk guruşunu İsmail Ağa’ya verip ve üç bin dokuz yüz seksen yedi buçuk [78b] guruşunu Sakābaşı yediyle Mekke-i mükerreme’ye kendüye irsâl edip ve yüz yetmiş dört guruşu merhûm-ı mezbûrun ta‘yîn eylediği ma‘lûmü’l-esâmî kimesnelere vazîfe verip yedinde bâkī kalan sekiz yüz seksen dört guruşdan tashîh-i mezbûr üzere müvekkilem mezbûre Kerime Hatun’a isâbet eden altı yüz altmış üç guruşu vekâletim hasebiyle mezbûr Mehmed Çelebi yedinden bi’t-tamâm ve’l-kemâl ahz u kabz edip mezbûr Mehmed Çelebi’nin makbûz ve masrûfuna müte‘allıka âmme-i da‘vâdan zimmetini ibrâ-i âmm-ı katı‘u’n-nizâ‘la ibrâ ve iskāt eyledim dedikde vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hüseyin b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Hurrire fî 25 min-Rebî‘i’l-evvel sene aşer ve mi’e ve elf. Şuhûdü’l-hâl: el-Hâc Osman b. Mustafa, el-Hâc Esad Ağa b. Nimetullah, el-Hâc İsmail b. Ali, el-Hâc Mustafa b. İbrahim, Ahmed Efendi b. Mehmed, (…) b. Hasan, Mehmed Çelebi b. Nasuh, Tüfenkçizâde Mehmed Çelebi, Bektaş Beşe, el-Hâc Yusuf.