Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 426 Hüküm no: 308 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı köle Hasan’ın hür olduğunu ispat ettiği Hilâl-i sütûrda mastûr olan husûsun mahallinde istimâ‘ ve tahrîri iltimâs olunmağın savb-ı şer‘den irsâl olunan Mevlana Ahmed Efendi b. el-merhûm Mustafa Efendi mahmiye-i İstanbul’da Haraccı Muhyiddin mahallesinde sâkin iken bundan akdem vefât eden Hâfız Mehmed Efendi b. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm etti[kde] müteveffâ-yı mezbûra rıkk-ı sâbıkını mu‘terif işbu orta boylu çatık kaşlı elâ gözlü Rusiyyü’l-asl Müslimü’l-mille râfi‘ü’l-kitâb Hasan b. Abdullah meclis-i ma‘kūd-ı mezbûrda müteveffâ-yı mezbûrun sagīr oğulları Süleyman ve İbrahim’in li-ebeveyn ammileri oğlu ve tesviye-i emrlerine vasiyy-i muhtârları Süleyman Çelebi b. Osman mahzarında üzerine da‘vâ ve takrîr-i kelâm edip seyyidim müteveffâ-yı mezbûr Hâfız Mehmed Efendi b. Osman hâl-i marazında târîh-i fevtinden on gün mukaddem beni malından tahrîr ve i‘tâk ve zümre-i ahrâr-ı asliyyîne idrâk ve ilhâk etmeğin terekesinin sülüsü dahi fetâ kıymetimin sülüsânı olan elli guruşa müsâ‘id olmağın ben sâir harâir-i asliyyîn gibi hür olmuş iken vasiyy-i merkūm bana terekeden olup rık olmak üzere bi-gayr-ı hakkın vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl vasiyy-i merkūm cevâbında mevsûf-ı mezbûra vech-i muharrer üzere vaz‘-ı yedini ikrâr edip lâkin müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden olup zikr olunan Haraccı Muhyiddin mahallesinde sâkin <> Hasan Ağa b. Mustafa ve Yahya Ağa b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hâfız Mehmed Efendi b. Ahmed hâl-i marazında târîh-i fevtinden on gün mukaddem abd-ı memlûkü olan işbu mevsûf Hasan’ı huzûrumuzda malından tahrîr ve i‘tâk ve zümre-i ahrâr-ı asliyyîne idrâk ve ilhâk eyledi ve terekesinin sülüsü dahi mevsûf-ı mezbûrun fetâ kıymetinin sülüsânı olan elli guruşa müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde istimâ‘ ve ketb ü tahrîr ba‘dehû ma‘an ba‘s olunan İbrahim Çelebi [b.] Mehmed ve Nuh Çelebi b. Ahmed ile meclis-i şer‘a gelip alâ-vukū‘ihi inhâ ve takrîr etmeğin kayd-şüd. Fî 17 min-Rebî‘i’l-evvel sene aşer ve mi’e ve elf. Şuhûdü’l-hâl: Ahmed Efendi el-İmâm, Ahmed Efendi b. İsmail, el-Hâc Mehmed el-Müezzin, İbrahim b. Abdullah, Ali Ağa b. Abdullah, Ali b. Mustafa, Mustafa b. Ali.