Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 431 Hüküm no: 313 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ayşe Hanım’ın varislerinden kız kardeşi Zeyneb’in hissesinin Ayşe Hanım’ın kocası Mehmed Ağa tarafından ödenmesi Mahmiye-i İstanbul’da Seydi Ağa mahallesinde sâkine iken bundan akdem vefât eden Âişe Hanım bt. el-merhûm Abdurrahman Paşa’nın verâseti zevc-i metrûku olup medîne-i Basra’da sâkin Mehmed Ağa b. Abdurrahman ile sagīre kızı Safiye <> Hanım’a ve li-ebeveyn kız karındaşı Zeyneb Hanım’a münhasıra olup kable’l-kısme mezbûre Safiye Hanım dahi vefât edip verâseti babası mezbûr Mehmed Ağa’ya münhasıra oldukdan sonra mezbûr Mehmed Ağa’nın hisse-i mevkūfesini ahz u kabz ve hıfza kıbel-i şer‘den vasî [ve] kayyım nasb olunan İsmail Ağa b. Mustafa hasbî nâzırası ve mezbûr Mehmed Ağa’nın vâlidesi Râbia hâzıra iken mahfil-i kazâda mezbûre Zeyneb Hanım tarafından husûs-ı âti’l-beyânda vekîli olduğu [79b] zât-ı mezbûreyi ma‘rifet-i şer‘iyye ile ârifân Nişancı Paşa-i Atîk mahallesinde sâkin Kethüdâ Ali Ağa b. Ramazan ve zikr olunan Seydi Ağa mahallesinde sâkin Mustafa b. Ahmed şehâdetleriyle mahzar-ı hasm-ı câhidde şer‘an sâbit olup sübût-ı vekâletine hükmolunan Hasan Bey b. Salih mahzarında üzerine da‘vâ ve takrîr-i kelâm edip müteveffât-ı mezbûre Âişe Hanım’ın zevci gāib-i mezbûr Mehmed <> Ağa zimmetinde para dört hesâbınca mütekarrir ve ma‘kūdun-aleyh olan yüz seksen bin akçe mehr-i müeccel hakkından Zeyneb Hanım’a isâbet eden kırk beş bin akçeyi mezbûre Zeyneb Hanım sâir tereke ile kabz edip mehr-i müeccel-i merkūm gayr-ı makbûz iken mezbûre Zeyneb Hanım’ın kabzı gayr-ı meşrû‘ olmağın makbûzu olan kırk beş bin akçeyi mezbûre Zeyneb Hanım’dan taleb eylediğimde teslîmden imtinâ‘ eder suâl olunsun dedikde gıbbe’s-suâl vekîl-i merkūm cevâbında mezbûr Mehmed Ağa bin yüz yedi senesi Zilka‘desi evâilinde medîne-i Basra’da Hasan Cemal mahallesinde sâkin Rûznâmçeci Abdüllatif’in menzilinde misâfir iken vefât edip Hazret-i Zübeyr makāmında defn olunup ve mezbûr Mehmed Ağa zimmetinde olan seksen bin akçeden müvekkilem mezbûreye isâbet eden kırk beş bin akçeyi vasiyy-i mezbûr yedinde olan hissesinden kabz eylemişdir deyü def‘le mukābele ve istintâk olunsun dedikde gıbbe’l-istintâk ve’l-inkâr vekîl-i mezbûrdan def‘-i mezkûruna beyyine taleb olundukda udûl-ı Müslimînden ve târîh-i mezbûrda Basra mütemekkinlerinden ve sâbıkā Basra deftedârı olup hâlâ mahmiye-i mezbûre[de] Vezirhanı’nda müsâfiren sâkin Mustafa Efendi b. el-Hâc Ahmed ve târîh-i mezbûrda mezbûr Abdüllatif’in hizmetkârı olup hâlâ mahmiye-i mezbûrda Altımermer kurbünde Medrese odaları denmekle ma‘rûf odalarda sâkin Abdullah Çelebi b. İsmail li-ecli’ş-şehâde meclis-i şer‘a hâzırân [olup isre’l-]istişhâd fi’l-hakīka mezbûr Mehmed Ağa [bin] yüz yedi senesi Zilka‘desi evâilinde medîne-i Basra’da Hasan Cemal mahallesinde sâkin <> <> Rûznâmçeci Abdüllatif’in menzilinde misâfir iken huzûrumuzda vefât ve biz cenâzesine hâzır olup Hazret-i Zübeyr makāmında defn olundu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde şâhidân-ı mezbûrânı tezkiye içün cânib-i şer‘den me’zûnen Abdurrahman Efendi irsâl olunup ol dahi evvelâ zikr olunan Vezirhanı’na varıp sükkânından Ahmed Ağa b. Abdullah ve Mustafa Ağa b. Hüseyin ve İbrahim Ağa b. Abdullah ve Yahya Ağa b. Bayram ve Beşir Ağa b. Hamza ve el-Hâc Niyazi b. Reşid ve el-Hâc İbrahim Ağa b. el-Hâc Niyazi’den şâhid-i mezbûr Mustafa Efendi’yi tezkiye ettikde her biri şâhid-i mezbûr içün adl ve makbûl-i şehâdedir deyü haber verdiklerin ve sâniyen zikr olunan odalara varıp ahâlîsinden Ahmed Beşe b. Mehmed ve Abdurrahman Çelebi b. Abdülhalim ve Mustafa Beşe b. Yahya ve Habib Efendi b. Receb ve İbrahim b. Mehmed’den tezkiye ettikde her biri şâhid-i mezbûr içün adl ve makbûl-i şehâdedir deyü haber verdiklerin müteveffâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Mehmed ve Ahmed b. Süleyman ile meclis-i şer‘a gelip inhâ ve takrîr etmeğin mûcebiyle ba‘de’l-hükm kayd-şüd. Hurrire fî 24 min-Rebî‘ülevvel sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi b. ( ), Mehmed Efendi b. Süleyman, Mehmed Ağa b. İbrahim, Ali Ağa b. Ramazan.