Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 454 Hüküm no: 328 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Mehmed Çelebi’nin müteveffa Saraç Mehmed Çelebi’de alacağı olduğunu ispat ettiği Kezâlik münhasıra oldukdan sonra sarrâc tâifesinden bâ‘isü’l-kitâb Mehmed Çelebi b. Mustafa mahfil-i kazâda tereke-i müteveffâ-yı mezbûra bi’l-verâse vaz‘-ı yed eden mezbûr Ali Beşe mahzarında üzerlerine da‘vâ ve takrîr-i kelâm edip müteveffâ-yı mezbûr Mehmed Çelebi b. Receb b. Abdullah zimmetinde yedimden müşterâ ve makbûz sarrâc metâ‘ı bahâsından ba‘de küllî hesâb altmış guruş hakkım olup hattâ müteveffâ-yı [mezbûr] hâl-i kemâl-i sıhhatinde cihet-i mezbûreden bana ol kadar guruş <> vâcibü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı [ri]câl-i Müslimînden sarrâc tâifesinden olup mahmiye-i mezbûrede Suhte Sinan mahallesinde sâkin Mehmed Çelebi b. Receb ve Hüseyin Çelebi b. Osman li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Çelebi b. Receb b. Abdullah hâl-i kemâl-i sıhhatinde işbu müdde‘î-i mezbûra sarrâc metâ‘ı bahâsından ba‘de küllî hesâb altmış guruş zimmetimde edâsı vâcib deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü [her biri edâ-i şehâdet-i şer‘iyye ettikde] ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb kayd-şüd. Hurrire [fî] 5 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Mustafa Çelebi b. Mehmed, Ahmed Çelebi b. Ramazan, Ahmed Çelebi b. Mehmed, Abdullah Çelebi b. Beşir, Ahmed Çelebi b. Süleyman.