Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 458 Hüküm no: 333 Orijinal metin no: [83b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin vefat eden Saraç Mehmed Çelebi’de alacağı olduğunu ispat ettiği Mahmiye-i İstanbul’da Laleliçeşme kurbünde sâkin olup bundan akdem vefât eden Saraç Mehmed Çelebi b. Receb’in verâseti vâlidesi Hadîce bt. Abdullah’a ve li-ebeveyn ammi oğlunun oğlu Ali Beşe b. Arslan’a münhasıra oldukdan sonra mahmiye-i mezbûrede Kurd Ağa mahallesinde sâkin bâ‘isü’l-kitâb Hüseyin Çelebi b. Osman mahfil-i kazâda müteveffâ-yı mezbûrun terekesine bi’l-verâse vaz‘-ı yed eden mezbûr Ali Beşe mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çelebi b. Receb b. Abdullah zimmetinde cihet-i karz-ı şer‘îden otuz guruş hakkım olup hattâ müteveffâ-yı mezbûr hâl-i kemâl-i sıhhatinde mahrûse-i Edirne’ye gider oldukda cihet-i mezbûrdan bana zimmetinde otuz guruş deyni olduğunu huzûrumuzda [huzûr-ı Müslimînde] ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Suhte Sinan mahallesinde [sâkin] Mercan Mehmed Çelebi b. Receb ve Sarrâc Mehmed Çelebi b. Mustafa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Saraç Mehmed Çelebi b. Receb b. Abdullah hâl-i kemâl-i sıhhatinde mahrûse-i mezbûreye gider oldukda işbu müdde‘î-i mezbûr Hüseyin Çelebi’ye cihet-i mezbûreden otuz guruş zimmetimde lâzımü’l-edâ deynimdir deyü huzûrumuzda ikrâr ve işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb kayd-şüd. Hurrire fî 5 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Mustafa Çelebi b. Mehmed, es-Seyyid Ahmed Çelebi b. Halil, Abdullah Çelebi b. Mehmed, Ahmed Çelebi b. Ramazan.