Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 459 Hüküm no: 335 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefat eden Ahmed Odabaşı’nın varisi olduğunu ispat ettiği Mahmiye-i İstanbul’da Sarıgez mahallesinde sâkin iken bundan akdem vefât eden Ahmed Odabaşı b. Mehmed b. Abdullah’ın vech-i âtî üzere li-ebin kız karındaşı ve usûbet-i nesebiye cihetinden verâsesi olduğunu iddi‘â eden mahmiye-i mezbûrda Arabacı Bayezid mahallesi ahâlîsinden Abdullah b. Mehmed ve Musa b. Mehmed ta‘rîfleri ile mu‘arrefe olan bâ‘isetü’l-kitâb Emine Hatun bt. Mehmed meclis-i şer‘de müteveffâ-yı mezbûrun zâhirde zevce-i menkûha-i metrûkesi Emetullah Hatun bt. Abdullah’dan gayrı vâris-i ma‘rûfu olmayıp terekesinin rub‘u mezbûreye ve selâse-i erbâ‘ı cânib-i beytülmâle âid olmak üzere mahmiye-i mezbûrede bi’l-fi‘il yeniçeri beytülmâl emîni olmağla terekesinin selâse-i erbâ‘ına bi’l-emâne vaz‘-ı yed ve kıbel-i şer‘den husûmet ve redd-i cevâba me’zûn olan el-Hâc Hüseyin Ağa b. Muslu mahzarında üzerine da‘vâ ve takrîr-i kelâm edip ben müteveffâ-yı mezbûr Ahmed Odabaşı ile karındaşlar olup babamız ismi Mehmed dedemiz ismi Abdullah maskat-ı re’simiz zikr olunan Arabacı Bayezid mahallesidir zâhirde müteveffâ-yı mezbûrun terekesinin selâse-i erbâ‘ına li-ümmin kız karındaşı Havva Hatun ile benden gayrı vâris-i âhar-ı müstahık yoğiken emîn-i merkūm bi-gayr-ı hakkın vaz‘-ı yed eder suâl olunsun dedikde gıbbe’s-suâl emîn-i merkūm cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve müdde‘iye-i mezbûrenin vech-i meşrûh üzere müdde‘âsını inkâr e[di]cek müdde‘â-yı [müdde‘iye-i] mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Sarıgez (Sarıgörez) mahallesi ahâlîsinden mu‘arrifân-ı mezbûrân Abdullah b. Mehmed ve Musa b. Mehmed li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr Ahmed Odabaşı ile işbu müdde‘iye-i mezbûre Emine Hatun li-ebin karındaşlar olup babaları ismi Mehmed dedeleri ismi Abdullah ve maskat-ı re’sleri zikr olunan Arabacı Bayezid mahallesidir zâhirde müteveffâ-yı mezbûrun terekesinin selâse-i erbâ‘ına müdde‘iye-i mezbûre Emine Hatun ile li-ümmin kız karındaşı Havva Hatun’dan gayrı vâris ve müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Saferi’l-hayr li-seneti aşer ve mi’ete ve elf. Şuhûdü’l-hâl: Uşşâkī Mehmed Efendi, İbrahim Çelebi, Ahmed Çelebi b. Süleyman, Mustafa Çelebi b. Süleyman, Ahmed Çelebi b. Mehmed.