Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 462 Hüküm no: 337 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Osman’ın varislerinin mirastan olan menzil ve bağı müştemilatıyla birlikte Mehmed Haseki’ye sattıkları Mahmiye-i İstanbul’da Altıbohça mahallesinde sâkin iken bundan akdem vefât [eden] el-Hâc Osman b. İbrahim’in verâseti kebîr oğulları el-Hâc Mustafa ve Ahmed ve kebîre kızları Havva ve Hadîce ve Fâtıma’ya münhasıra olup kable’l-kısme mezbûr el-Hâc Mustafa dahi fevt olup verâseti zevce-i menkûha-i metrûkesi Havva Hatun bt. Osman ve kebîre kızı Saliha’ya ve li-ebin er karındaşı mezbûr Ahmed Ağa’ya ve li-ebin karındaşları mezbûrât Havva ve Fâtıma ve Hadîce’ye münhasıra olup kable’l-kısme mezbûre Havva dahi vefât edip verâseti zevc-i metrûku el-Hâc Mehmed [b.] İbrahim’e ve vâlidesi Hadîce bt. Abdullah’a ve li-ebin er karındaşı mezbûr Ahmed Ağa’ya ve li-ebin kız karındaşları mezbûretân Fâtıma ve Hadîce’ye münhasıra ve tashîh-i meselesi alâ-tarîkı’l-münâsahati’ş-şer‘iyye bin altı yüz seksen sehmden olmağla sihâm-ı mezbûrenin üç mertebede beş yüz doksan sekiz sehmi mezbûr Ahmed Ağa’ya ve iki yüz doksan dokuzar sehmi üçer mertebede mezbûretân Fâtıma ve Hadîce’den her birine ve birer mertebede altmış sehmi mezbûre Havva Hatun bt. Osman’a ve yine bir mertebeden iki yüz kırk sehmi mezbûre Saliha Hatun’a ve yüz otuz sekiz sehmi bir mertebede mezbûr el-Hâc Mehmed b. İbrahim’e ve yine bir mertebede kırk altı sehmi mezbûre Hadîce bt. Abdullah’a isâbeti tahakkukundan sonra mezbûr Ahmed Ağa asâleten ve mezbûre Fâtıma bt. el-Hâc Osman tarafından müseccel vekîli ve zevci Ali Odabaşı b. Ahmed vekâleten ve mezbûre Hadîce bt. el-Hâc Osman tarafından müseccel vekîli ve zevci Hüseyin Çelebi b. Hüseyin vekâleten ve mezbûre Havva bt. Osman Ağa tarafından müseccel vekîli ve zevci Ahmed Efendi b. umdetü’l-mevâli’l-izâm Emin Mehmed Efendi vekâleten ve mezbûre Saliha bt. Hacı Mustafa tarafından kezâlik müseccel vekîli ve zevci es-Seyyid Mehmed Halil b. ( ) vekâleten ve mezbûre Hadîce bt. Abdullah tarafından müseccel vekîli mezbûr el-Hâc Mehmed b. İbrahim vekâleten <> ve asâleten meclis-i şer‘de Yoros kazâsına tâbi‘ Anadoluhisarı’nda sâkin bâ‘isü’l-kitâb Mehmed Haseki b. Osman mahzarında her biri ikrâr edip müteveffâ-yı evvel-i mezbûr el-Hâc Osman’ın ile’l-vefât yedinde mülk ve hakkı olduğu müsbet olup hisar-ı mezbûrda vâki‘ bir tarafdan Abdurrahman Çelebi mülkü ve bir tarafdan Abdi Paşa veresesi mülküne ve bir tarafdan ba‘zan Süleyman Çelebi mülkü ve ba‘zan tarîk-i hâs ve bir tarafdan Mehmed Çelebi mülküne müntehî iki bâb oda ve tahta-pûş ve bir ahır ve kenîf ve eşcâr-ı müsmire ve gayr-ı müsmire hadîkayı müştemil mülk menzil ve menzil-i mezbûra muttasıl lede’l-ahâlî ma‘lûmü’l-hudûd bir kıt‘a kürûmu mülk münâdîlerden Murtaza b. Abdullah yediyle sûk-ı sultânîde üç ay mikdârı nidâ ve müzâyede olunup rağabât-ı nâs bi’l-külliye münkatı‘a oldukdan sonra mezbûr Mehmed Haseki üzerinde üç yüz guruşda karâr edip ziyâde ile tâlib-i âhar zuhûr etmeyip meblağ-ı mezbûr yevm-i akdde semen-i misli olmağla menzil-i mezbûr ile bağ-ı mezbûru bi-cümleti’t-tevâbi‘ ve’l-levâhık safka-i vâhide ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Haseki’ye meblağ-ı mezbûr üç yüz guruşa bey‘ u temlîk ol dahi iştirâ ve temellük edip semeni olan meblağ-ı mezbûr üç yüz guruşu müşteri-yi mezbûr yedinden bi-kadri’l-hısâs alıp kabz edip menzil-i mezbûr ve bağ-ı mezkûru mahallinde kabza mezbûr Mehmed Haseki’yi taslît eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb kayd-şüd. Fî 3 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Mehmed Bey b. Ahmed Çukadâr-ı bostâniyân, Ali Beşe b. Veli Bakkāl, Ahmed Ağa b. Hüseyin, Hüseyin Efendi b. Mustafa, es-Seyyid Ali Çelebi Hisarlı, Abdurrahman Çelebi Hisârî.