Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 463 Hüküm no: 338 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Safiye Hatun’un varislerinin mirastan olan menzili müştemilatıyla birlikte Mustafa’ya sattıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mehmed Efendi b. İsa mahmiye-i İstanbul’da Yorgancılar çarşısında el-Hâc Ahmed b. Derviş Kapudan’ın mevzi‘ine varıp akd-i meclis-i şer‘-i şerîf ettikde mahmiye-i mezbûrede Silivrikapısı kurbünde sâkine iken bundan akdem vefât eden Safiye Hatun bt. Mustafa’nın verâseti zevc-i metrûku Ali Ağa’ya ve er karındaşı kızı Emine’nin oğlu Mustafa Beşe b. Salih’e münhasıra oldukdan sonra müteveffât-ı mezbûrenin sülüs-i malını vücûh-ı birr-i mu‘ayyeneye bâ-hüccet-i şer‘iyye sarfa vasiyy-i muhtârı olan el-Hâc Süleyman b. Abdülmennan meclis-i ma‘kūd-ı mezbûrda râfi‘ü’l-kitâb el-Hâc Mustafa b. el-Hâc Hüseyin mahzarında bi’l-vesâye ikrâr ve takrîr-i kelâm edip müteveffât-ı mezbûrenin hîn-i fevtine gelince yedinde mülk ve hakkı olduğu müsbet olan mahalle-i mezbûrede vâki‘ bir tarafdan ba‘zan Medîne-i Münevvere vakfı olan menzile ve ba‘zan Ağa hatunu mülkü ve bir tarafdan ba‘zan imâma meşrûta menzil ve ba‘zan tarîk-i âmma ve ba‘zan yine Ağa hatunu menziline ve bir tarafdan ba‘zan Hamza Bey mülkü ve ba‘zan yine Medîne-i mezbûre vakfı ve bir tarafdan ba‘zan Hamza Bey mülkü ve ba‘zan yine Medîne-i Münevvere vakfı ve bir tarafdan tarîk-i âm ile mahdûd olup dâhiliyesi üç bâb fevkānî oda ve iki sofa ve dehliz ve iki <> sofa ve bir matbah ve üç su kuyusu ve havlu ve bahçe ve köşk ve havuz ve iki kenîf ve hâriciyesi iki bâb fevkānî oda ve dehliz ve tahtında bir ahır ve bir su kuyusu ve kenîfi ve havluyu müştemil mülk menzilin sülüs-i şâyi‘ini müteveffât-ı mezbûrenin vücûh-ı birr ü hayr-ı mu‘ayyenesi’çün bi’l-vesâye bey‘ olunmak lâzım gelmeğin münâdîlerden el-Hâc Mustafa b. Abdullah yediyle sûk-ı sultânîde mecma‘-ı nâs olan mahallerde kırk gün mikdârı müzâyede olunup rağabât-ı nâs bi’l-külliye münkatı‘ oldukdan sonra mezbûr el-Hâc Mustafa Ağa üzerinde iki yüz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr iki yüz guruş sülüs-i şâyi‘-i mezkûrun yevm-i akdde semen-i misli olduğu el-Hâc Ahmed b. Derviş Kapudan ve Abdullah Halîfe b. Veli ve el-Hâc İsmail b. el-Hâc Mehmed ve el-Hâc İbrahim b. Seydi ve İbrahim Çelebi b. Ahmed ve el-Hâc Ahmed Çelebi b. Mustafa ve Mehmed Efendi b. Hasan haberleri ile lede’ş-şer‘i’l-enver zâhir ve mukarrer olmağın ben dahi sülüs-i şâyi‘-i mezbûru mezbûr el-Hâc Mustafa Ağa’ya iki yüz guruşa [85a] bey‘ u temlîk ve teslîm ol dahi iştirâ ve temellük ve kabûl eyledikden sonra semen-i mezbûr iki yüz guruşu mezbûr el-Hâc Mustafa Ağa yedinden tamâmen alıp kabz eyledim fîmâ-ba‘d sülüs-i şâyi‘-i mezbûr mezbûr el-Hâc Mustafa Ağa’nın mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î merkūm Ali Ağa’nın sulbî kebîr oğlu ve tarafından bâ-hüccet-i şer‘iyye müseccel vekîli Mustafa Ağa meclis-i ma‘kūd-ı mezbûrda müşteri-yi mezbûr el-Hâc Mustafa Ağa mahzarında bi’l-vekâle ikrâr ve takrîr-i kelâm edip menzil-i mahdûd-ı mezbûrun bâkī kalan dört sehminin iki sehm-i şâyi‘ini bi-hasebi’l-vekâle mezbûr Mustafa Ağa’ya iki yüz guruşa bey‘ u teslîm ol dahi iştirâ ve tesellüm ve kabûl edip semeni olan meblağ-ı merkūm iki yüz guruşu vekâletim hasebiyle yedinden tamâmen alıp kabz eyledim fîmâ-ba‘d iki sehm-i şâyi‘i dahi mezbûr el-Hâc Mustafa Ağa’nın mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîk ve gāib-i mezbûrun hisse-i mevkūfesini zabt ve hıfza kıbel-i şer‘den vasî ve kayyım nasb olunan Nef‘îzâde el-Hâc Hüseyin Efendi b. Murad meclis-i ma‘kūd-ı mezbûrda müşteri-yi mezbûr el-Hâc Mustafa Ağa mahzarında bi’l-vesâye ikrâr ve takrîr-i kelâm edip menzil-i mahdûd-ı mezbûrun iki sehm-i şâyi‘ini ben dahi mevkūfen mezbûr el-Hâc Mustafa Ağa’ya iki yüz guruşa bey‘ u teslîm etmeğin ol dahi iştirâ ve tesellüm [ve] kabûl edip semeni olan meblağ-ı mezbûr iki yüz guruşu bi-hasebi’l-vesâye merkūm el-Hâc Mustafa Ağa yedinden tamâmen alıp kabz eyledim ba‘de’l-yevm iki sehm-i şâyi‘i merkūm el-Hâc Mustafa Ağa’nın mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Süleyman b. İbrahim ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd-şüd. Fî 11 min-Rebî‘ülevvel sene 1110 Şuhûdü’l-hâl: Mehmed Efendi b. Hasan, Mustafa Çelebi b. İsmail, el-Hâc Hamza b. Abdullah, Mustafa b. Abdülbaki, Hasan b. Abdullah.