Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 476 Hüküm no: 346 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Cariye Nihali’nin hür olduğunu ispat ettiği Rıkk-ı sâbıkını mu‘terife işbu açık kaşlı elâ gözlü orta boylu Rusiyyetü’l-asl Müslimetü’l-milleti hâfızatü’l-kitâb Nihali bt. Abdullah meclis-i şer‘-i hâtır-ı lâzümü’t-tevkīrde mahmiye-i İstanbul’da Gül Câmi‘i kurbünde sâkin iken düyûnu terekesinden ezyed olduğu hâlde vefât eden es-Seyyid Osman Efendi b. Mehmed’in tesviye-i umûruna kıbel-i şer‘den vasî ve kayyım nasb olunmakla terekesine vaz‘-ı yed eden Mehmed Efendi b. Abdullah mahzarında üzerine da‘vâ ve takrîr-i kelâm edip seyyidim müteveffâ-yı mezbûr es-Seyyid Osman Efendi b. Mehmed hâl-i kemâl-i sıhhatinde fevtinden bir ay mukaddem hasbeteten lillâhi te‘âlâ huzûr-ı Müslimînde malından tahrîr ve i‘tâk ve harâir-i asliyyîn silkine ilhâk etmekle ben hürre olmuş iken vasiyy-i mezbûr rık olup terekeden olmak üzere bi-gayr-ı hakkın vaz‘-ı yed eder suâl [olunup] sebîlim tahliye olunmak matlûbumdur dedikde gıbbe’s-suâl vasiyy-i mezbûr cevâbında mevsûfe-i mezbûreye ber-vech-i muharrer vaz‘-ı yedini ikrâr lâkin vech-i muharrer üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Elvanzâde mahallesinde sâkin Şahin Beşe b. Abdullah ve nisâ-i sâlihâtdan zikr olunan Gül Câmi‘i kurbünde sâkine Fâtıma Hatun bt. Mehmed ve Ümmühani Hatun bt. Ahmed li-ecli’ş-şehâde meclis-i şer‘a hâzır[û]n [olup] isre’l-istişhâd fi’l-hakīka es-Seyyid Osman Efendi b. Mehmed hâl-i sıhhatinde fevtinden bir ay mukaddem müdde‘iye-i mezbûre Nihali’yi mülkünde olduğu hâlde hasbeten lillâhi te‘âlâ huzûrumuzda malında tahrîr ve i‘tâk ve harâir-i asliyât silkine ilhâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb kayd-şüd. Fî 4 min-Rebî‘i’l-evvel li-seneti aşer ve mi’ete ve elf. Şuhûdü’l-hâl: es-Seyyid Abdülmuti Efendi, Yahya Efendi b. Mustafa, Ahmed Efendi b. Mehmed, Süleyman Efendi b. Mehmed, Ahmed Çelebi b. Ali.