Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 478 Hüküm no: 348 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Limoncu Mustafa’nın çocuklarının vasisi Ahmed Efendi’nin muhasebesi İstanbul’da Sarı Demirci mahallesi ahâlîsinden olup bundan akdem tarîk-i hacda vefât eden Limoncu el-Hâc Mustafa b. Zülfikâr’ın li-ebeveyn evlâd-ı sıgārı Ali ve Hasan ve Ömer’in tesviye-i emrlerine vasiyy-i muhtârları olan li-ebeveyn ammileri Ahmed Efendi’nin üzerine hasbî nâzıra olan zikr olunan sagīrlerin vâlideleri Emetullah Hatun bt. Hasan talebiyle bin yüz dokuz senesi Rebî‘ülevveli gurresinden yüz on senesi Rebî‘ülevveli gāyetine gelince on üç ayda makbûz ve masrûfunun görülen hesâbı defteridir ki ber-vech-i âtî zikr-şüd. Fî gurreti Rebî‘i’l-evvel li-seneti aşer ve mi’ete ve elf. Ber-mûceb-i defter-i muhâsebe zikr olunan sagīrlerin mal-ı müntakilleri 1009 guruş, 1 rub‘ Meblağ-ı mezbûr alâ-tarîkı’l-istiğlâl …? iştirâ olunan mahzen icâresinden vasiyy-i mezbûrun makbûzu olan iki yüz seksen yedi buçuk guruşun yirmi guruşu muhâsebe-i sâbıka idhâl olunmağla bâkī kalan icâre 267,2 guruş Meblağ-ı mezbûr ile iştirâ olunan kahve fâidesinden makbûz-ı vasî 52 guruş Zikr olunan sagīrlere müteveffâ-yı mezbûrdan müntakil vakıf mahzen icâresi 24 guruş Cem‘an yekûn: 1352,75 guruş. Minha’l-ihrâcât: Müddet-i mezbûrede yevmî on beş paradan nafaka-i mefrûzaları 146,5 guruş Zikr olunan kahve hammâliyesi ve mahzen icâresi 22 guruş İcâre-i vakf-ı mahzen 1 guruş Sagīrlere isti‘mâl içün alıverdiği yorgan ve minder ve iki yastık ve bir kebe semenleri 7,5 guruş Sagīrlerin vakıf menzillerini vâlideleri bir tarîk ile üzerine ettirmemekle menzil-i mezbûr da‘vâsi’çün ihrâc olunan üç kıt‘a evâmir-i şerîfe harcı 10 guruş Zikr olunan menzil da‘vâsi’çün iki def‘a Edirne’ye varıp bir ay mikdârı meks etmekle harc-ı râh ve ücret 25 guruş Menzil-i mezbûru sagīrlere hükm hücceti harcı 15 guruş <> Husûs-ı mezbûr içün alınan mübâşire ücret 10 guruş Harc-ı muhâsebe 8 guruş Kâtibiye 2 guruş Hüddâmiye 2 guruş Kaydiye 0,5 guruş Cem‘an ihrâcât: 249,5 guruş. Sahhe’l-bâkī Meblağ-ı mezbûr yüz altmış dört guruş ile vasiyy-i mezbûr her keyli yirmi dörder paraya olmak üzere iki yüz seksen keyl pirinç ve iki yüz yetmiş guruş ile her birer vukıyesi yüz beş guruşa olmak üzere iki yüz altmış vukıye kahve iştirâ edip bey‘ olundukda fâidesi sagīrlerin olmak üzere vasî yedinde ibkā olundukdan sonra bâkī altı yüz yetmiş dokuz buçuk guruş bezzâzistâna vaz‘ olunduğu bu mahalle şerh verildi.