Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 479 Hüküm no: 349 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin varislerinin, mûrislerinin vasisi Mustafa’daki miras parayı teslim aldıkları Mısr-ı Kāhire’de vefât eden el-Hâc Ahmed b. Abdurrahman’ın li-ebeveyn karındaşı oğlu ve hasren vârisi olup Kandiye kal‘asında sâkin elli üç bölük odası yoldaşlarından Mustafa Beşe b. Şa‘bân’ın vâlidesi mezbûr Mustafa Beşe’nin fevtini iddi‘â edip mahmiye-i İstanbul’da el-Hacce Hatun mahallesinde sâkine ve zâtı Hüseyin Beşe b. Mehmed [ve] Hüseyin b. Ali ta‘rîfleriyle mu‘arrefe olan Hadîce Hatun bt. Abdullah meclis-i şer‘de mezbûr Mustafa Beşe bâliğ ve gayr-ı reşîd olmağla tesviye-i emrine vasiyy-i mansûbu ve mal-ı müntakilini zabt ve hıfz eden Hoca Resmî mahallesi [sâkin] olan el-Hâc Abdurrahman mahzarında üzerine da‘vâ ve takrîr-i kelâm edip oğlum mezbûr Mustafa Beşe bin yüz iki senesinde Kandiye kal‘asında zikr olunan elli üç bölük odasında mustahfız iken bi-emrillâhi te‘âlâ sene-i mezbûre Recebi’nde fevt olup namazı kılınıp hâric-i kal‘ada mekābir-i Müslimîne defn olunmağla verâseti bana ve li-ümmin karındaşı işbu Mahmud b. Receb’e münhasıra iken vasiyy-i mezbûrun ber-mûceb-i hüccet para üç akçe hesâbınca makbûzu olan on üç bin üç yüz seksen akçenin beş bin iki yüz akçesini mezbûr Mustafa Beşe hayâtında vasiyy-i mezbûr yedinden ahz u kabz edip bâkī kalan beş bin yüz seksen akçesini taleb eylediğimizde bize teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında bâkī ol kadar akçeye vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda zikr olunan oda yoldaşlarından olup hîn-i fevtinde yanında bulunup hâlâ mahmiye-i mezbûrede el-Hâc İlyas mahallesinde sâkin Mehmed Beşe b. İbrahim ve Hasan Beşe b. Ali li-ecli’ş-şehâde meclis-i şer‘a hâzırân [88a] olup isre’l-istişhâd fi’l-hakīka işbu müdde‘iye-i mezbûrenin oğlu ve mezbûr Mahmud’un li-ümmin karındaşı olan mezbûr Mustafa Beşe b. Şa‘bân kal‘a-i mezbûrede zikr olunan odasında mustahfız iken bi-emrillâhi te‘âlâ yüz iki senesi Recebi’nde fevt olup cenâzesine hâzır olup namazı kılınıp hâric-i kal‘ada mekābir-i Müslimîne huzûrumuzda defn olundu biz bu husûsa bu vech üzere şâhidleriz şehâdet dahi ederiz deyü her biri edâ-i [şehâdet-i] şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı bâkī-i merkūmu müdde‘iyân-ı mezbûrâna edâ ve teslîme vasiyy-i mezbûra tenbîh olundukdan sonra mezbûre Hadîce ile mezbûr Mahmud meclis-i mezkûrda vasiyy-i mezbûr mahzarında ikrâr ve takrîr-i kelâm edip ânifen edâsına tenbîh olunan meblağ-ı bâkī-i merkūm beş bin yüz seksen akçeyi vasiyy-i mezbûr yedinden tamâmen alıp kabz eyledik min-ba‘d meblağ-ı merkūmdan yedinde ve zimmetinde bir akçe hakkımız bâkī kalmayıp husûs-ı mezbûra müte‘allıka âmme-i da‘vâdan vasiyy-i mezbûrun zimmetini ibrâ-i âm ile ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Rebî‘ülâhir sene 1110 Şuhûdü’l-hâl: İbrahim Ağa Kethüdâ, Mustafa Efendi b. Mehmed, Seyyid Abdullah Efendi İbadzâde, Yahya Efendi, Mustafa Ağa Eyyûbî, Ahmed Çelebi b. Süleyman, Osman Çelebi b. Mehmed ve gayruhum mine’l-huzzâr.