Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 481 Hüküm no: 350 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet’in vasisi Danyel’in terekeden mal gizlediği iddiasıyla Karabet’in hanımı Nazlı’ya açtığı davayı ispat edemediği Husûs-ı âti’l-beyânın mahallinde istimâ‘ ve tahrîri içün bi’l-iltimâs kıbel-i şer‘den me’zûnen irsâl olunan Mevlânâ İsa Efendi b. el-Hâc Yusuf mahmiye-i İstanbul’da Şeyh Ferhad mahallesinde sâkin iken bundan akdem hâlik olan Karabet v. Sefer v. Hüdaverdi’nin ile’l-helâk sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde hâlik-i mezbûrun düyûnu terekesinden ezyed olduğu <> olmağla veresesi terekesinden kasr-ı yed etmekle tesviye-i umûruna ve guremâsıyla husûmet ve redd-i cevâba kıbel-i şer‘den vasî ve kayyım nasb olunan Danyel v. Ağbel(?) meclis-i ma‘kūd-ı mezbûrda hâlik-i merkūmum zevce-i <> metrûkesi olup zâtı mahalle-i mezbûre ahâlîsinden Şahin v. Kosta ve Uğurlu v. Simo ta‘rîfleriyle mu‘arrefe olan hâfızatü’s-sifr Nazlı bt. Dukovici(?) mahzarında üzerine bi’l-vesâye da‘vâ ve takrîr-i kelâm edip hâlik-i merkūmun mezbûre Nazlı yedinde olan terekesi tahrîr-i defter olundukdan sonra hâric ez defter bin akçe kıymetli çuka ferâce ve iki bin akçe kıymetli on aded sîm kadeh ve beş bin akçe kıymetli demir tahtası, nîmten kürkü mezbûre Nazlı ketm ü ihfâ eylemişdir suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden ızhâr-ı acz etmeğin istihlâf(?) etmeğin eşyâ-i mezbûre ve bi’l-cümle ismi mal ıtlâk olunur terekesini bir vechile ketm ü ihfâ ve veresesine redd ü damân lâzım gelmediğine merkūme Nazlı bt. mesfûre Dukovici(?) zimmîye yemîn teklîf olundukda ol dahi vefki’l-mesûl yemîn billâhillezî enzele’l-İncîle alâ-Îsâ -aleyhi’s-selâm- etmeğin müdde‘î-i mezbûr Danyel v. Ağbel(?) husûs-ı mezbûra müte‘allıka mezbûre Nazlı ile bilâ-beyyine bî-vech mu‘ârazadan men‘ birle vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Süleyman b. Hasan ve Muhzır İbrahim Çelebi b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Hurrire fî 4 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Kapudan Mehmed Efendi b. Abdülfettah, Kara Çavuşzâde Mustafa Çelebi b. Ömer Ağa, İmâm Hüseyin Efendi b. Hasan, Berber Abdullah Çelebi, Yakub Beşe b. Davud.