Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 482 Hüküm no: 352 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın vefat eden Mahmud Çelebi’deki alacağı olduğunu ispat edip vasisinden tahsil ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden me’zûnen irsâl olunan Mevlânâ Yahya Efendi b. el-merhûm Mustafa Efendi mahmiye-i İstanbul’da Süleymaniye mahallesinde [Bozdoğan]kemeri odalarında fahrü’t-tüccâr es-Seyyid Ahmed Ağa’nın sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Cezerî Kasımpaşa mahallesi sâkinelerinden olup hâlâ medîne-i Üsküdar’da Sultantepesi’nde sâkine fahrü’l-muhadderât Âişe Hanım bt. Hasan Efendi b. Burhan Efendi tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahmiye-i mezbûrede Yarhisar mahallesinde sâkin umdetü’s-sâlikîn eş-Şeyh Mehmed Efendi b. eş-Şeyh Abdullah Efendi ve el-Hâc Hasan Ağa b. Ahmed şehâdetleriyle mahzar-ı hasm-ı câhidde sâbit ve sübût-ı vekâletine hükmolunan bâ‘isü’l-kitâb fahrü’l-a‘yân Haseki Süleyman Ağa b. Zünnun meclis-i ma‘kūd-ı mezbûrda zikr olunan Cezerî Kasımpaşa mahallesinde sâkinen fevt olan merhûm es-Seyyid Mahmud Çelebi b. el-Hâc Mehmed b. el-Hâc Nasırüddin’in sulbî oğlu olmağla terekesine vaz‘-ı yed eden mezbûr es-Seyyid Ahmed Ağa mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Âişe Hanım’ın merhûm-ı mezbûr es-Seyyid Mahmud Çelebi zimmetinde işbu temessük mûcebince cihet-i karzdan bir def‘a üç bin beş yüz guruş ve bir def‘a üç yüz elli guruş ve yedinden müşterâ ve makbûz [88b] yastık semeninden beş yüz guruş ve Rusiyyü’l-asl Yusuf nâm gulâm semeninden seksen guruş ve bir cild kitâb semeninden altmış guruş ve ber-vech-i peşîn aldığı harc içün dört yüz yirmi guruş min-haysü’l-mecmû‘ dört bin dokuz yüz on guruş hakkı olup hattâ merhûm-ı mezkûr Seyyid Mahmud Çelebi hâl-i kemâl-i sıhhatinde zikr olunan cihetlerden benim müvekkilem mezbûre Âişe Hanım’a lâzımü’l-kazâ deynimdir deyü huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Cezerî Kasımpaşa mahallesinde sâkin mezbûr el-Hâc Hasan Ağa b. Ahmed ve el-Hâc Abdulkadir Çelebi b. el-Hâc Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka merhûm-ı mezbûr es-Seyyid Mahmud Çelebi b. el-Hâc Mehmed b. el-Hâc Nasırüddin hâl-i kemâl-i sıhhatinde müvekkilem mezbûre Âişe Hanım bt. Hasan Efendi b. Burhan Efendi’ye cihet-i karzdan bir def‘a üç bin guruş ve bir def‘a üç yüz elli guruş ve yastık semeninden beş yüz ve Yusuf nâm gulâm semeninden seksen guruş ve bir cild kitâb semeninden altmış guruş ve ber-vech-i peşîn harcdan dört yüz yirmi guruş min-haysü’l-mecmû‘ dört bin dokuz [yüz] on guruş zimmetimde lâzımü’l-kazâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mevkūfün alâ-yemînü’l-müvekkileti’l-mezbûre mûcebiyle ba‘de’l-hükm vekîl-i mezbûr Haseki Süleyman Ağa mezbûr es-Seyyid Ahmed Ağa mahzarında ikrâr ve takrîr-i kelâm edip ânifen edâsına hükmolunan meblağ-ı mezbûrun bin iki yüz on guruşunu müvekkilem mezbûre Âişe Hanım mezbûr es-Seyyid Ahmed Ağa yedinden kabz edip ve üç bin dört yüz elli guruşunu ber-mûceb-i hüccet menzil semeninden takas edip meblağ-ı bâkī iki yüz elli guruşu dahi ben vekâletim hasebiyle mezbûr es-Seyyid Ahmed Ağa yedinden alıp kabz eyledim mezbûr meblağ-ı mahkûmun-bih-i merkūm dört bin dokuz yüz on guruşdan mezbûr es-Seyyid Ahmed Ağa yedinde bir akçe ve bir habbe bâkī kalmadı dedikde gıbbe’t-tasdîkı’l-mu‘teber vâki‘ hâlî mevlânâ-yı [mezbûr] mahallinde tahrîr ba‘dehû İbrahim b. Mehmed ve İbrahim b. Hasan ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fî gurre-i şehri Rebî‘i’l-âhir li-seneti aşer ve mi’ete ve elf. Şuhûdü’l-hâl: Umdetü’s-sâdât es-Seyyid Abdülkerim Efendi b. Selahaddin, es-Seyyid Hasan Çelebi b. Ömer, es-Seyyid Mustafa Ağa b. es-Seyyid Mehmed, es-Seyyid Ömer Çelebi b. Mehmed, Hasan Ağa b. Fethullah.