Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 483 Hüküm no: 353 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi’nin varislerinin mirastan olan menzil ve müştemilatını Ayşe Hanım’a sattıkları Husûs-ı âti’z-zikrin mahallinde tahrîri içün savb-ı şer‘den bi’l-iltimâs nasb olunan Mevlânâ Yahya Efendi b. Seyyid Mustafa Efendi mahmiye-i İstanbul’da Süleymaniye mahallesinde Bozdoğankemeri odalarında merhûm es-Seyyid Mahmud Çelebi b. el-Hâc Mehmed’in ile’l-vefât yedinde ve tasarrufunda olan menzil-i âti’z-zikre varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde merhûm-ı mezbûrun kebîr oğlu es-Seyyid Ahmed Ağa asâleten ve li-ebin kız karındaşı Şerife Zeyneb’in müseccel vekîli olmağla vesâyeten ve li-ebin sagīre kız karındaşı Şerife Râbia’nın vasiyy-i muhtârı olmağla vesâyeten meclis-i ma‘kūd-ı mezbûrda sâhibetü’l-kitâb fahrü’l-muhadderât Âişe Hanım bt. Hasan Efendi b. Burhan Efendi tarafından husûs-ı âti’l-beyânda vekîl-i şer‘îsi umdetü’l-a‘yân Haseki Süleyman Ağa b. <> Zünnun mahzarında ikrâr ve takrîr-i kelâm edip zikr olunan odalar dâhilinde bir tarafdan Meryem Hatun menzili ve bir tarafdan Haffâf Mehmed Çelebi menzili ve bir tarafdan zikri âtî arsa ve bir tarafdan tarîk-i âmma müntehî ve dâhiliyede tabaka-i ulyâda üç bâb oda ve iki sofa ve vüstâda iki bâb oda ve altında bir matbah ve hâriciyede fevkānî iki oda ve tahtânî bir oda ve bir ahırı muhtevî senede Sahhâf Muslihiddin Vakfı’na beş yüz kırk akçe icâre-i müeccelesi olup bize müntakil menzilimizi bâ-ma‘rifet-i mütevellî dört yüz elli guruş bedel mukābelesinde müvekkile-i mezbûre Âişe Hanım’a ferâğ ve tefvîz ol dahi tefevvüz ve kabûl eylediğinden sonra yine hudûd-ı mezbûre dâhilinde menzil-i mezbûra mülâsık ve munzam mülk-i mezbûrumuz olan câmekânlı bir hamam ve matbah ve tahta-pûş ve havluyu müştemil menzil ile iki tarafdan sâlifü’z-zikr menziller ve bir tarafdan tarîk-i hâs ve bir tarafdan tarîk-i âmm-ı mahdûd tûlen ve arzen be-hesâb-ı terbî‘î dört yüz otuz iki zirâ‘ arsa-i hâliye-i memlûkemizi müvekkile-i mezbûre Âişe Hanım’a bi-safkatin vâhidetin üç bin guruşa tarafeynden îcâb ve kabûlü [hâvî] bey‘-i bâtt-ı kat‘î ile bey‘ u temlîk ve teslîm ol dahi iştirâ ve kabûl ve tesellüm ettiğinden sonra menzil-i mezbûr dört yüz elli guruş bedel ile semen-i mezbûr üç bin guruş ki min-haysü’l-mecmû‘ üç bin dört yüz elli guruşu ber-mûceb-i hüccet-i şer‘iyye müvekkile-i mezbûre Âişe Hanım’ın hakk-ı müsbeti olan dört bin dokuz yüz on guruşun üç bin dört yüz elli guruşuna takas ol dahi kabûl etmekle emlâk-i muharrere-i mezbûre müvekkile-i mezbûrenin mülk-i müşterâsı ve mârrü’z-zikr vakıf menzil dâhil-i havza-i tasarrufu olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan İbrahim Çelebi b. Mehmed ile meclis-i şer‘a gelip inhâ ve takrîr etmeğin kayd-şüd. Hurrire fi’t-târîhi’l-mezbûr li-seneti’l-mezbûr. Şuhûdü’l-hâl: Eş-şâhidûnü’s-sâbikūn.