Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 484 Hüküm no: 354 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin vefat eden Yusuf Çelebi’ye emanet verdiği eşyasının terekeden iade edilmesi Mahrûse-i Galata muzâfâtından kasaba-i Kasımpaşa’da Câmi‘-i kebîr mahallesinde sâkin bâ‘isü’l-kitâb Halil Beşe b. Receb meclis-i şer‘-i hatîr-ı lâzımü’t-tevkīrde mahmiye-i İstanbul’da Servi mahallesinde sâkin iken bundan akdem vefât eden Yusuf Çelebi b. Abdullah’ın zevce-i menkûha-i metrûkesi ve evlâd-ı sıgārının tesviye-i emrlerine kıbel-i şer‘den mansûbe vasîleri olmağla terekesine vaz‘-ı yed edip zâtı ta‘rîf-i şer‘î ile mu‘arrefe olan Safiye Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Yusuf Çelebi b. Abdullah’a hayâtında fevtinden dokuz ay mukaddem işbu bir sîm üsküfümü îdâ‘ ve teslîm edip hâlâ aynı mevcûd olmağla taleb eylediğimde mezbûre Safiye bana teslîmden imtinâ‘ eder suâl olunsun dedikde gıbbe’s-suâl [89a] ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Denizabdal mahallesinde sâkin Hasan Beşe b. Abdullah ve Şeyh Vefâ mahallesinde sâkin Ömer Çelebi b. Abdi li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr Halil Beşe işbu bir sîm yüylüğünü? müteveffâ-yı mezbûr Yusuf Çelebi b. Abdullah’a huzûrumuzda îdâ‘ ve teslîm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî evâhiri Rebî‘i’l-[evvel] li-seneti aşer ve mi’ete ve elf. Şuhûdü’l-hâl: Abdurrahman Efendi b. Ahmed Efendi, es-Seyyid Abdülmuti Efendi, Hasan Çelebi b. Abdullah, Hüseyin Çelebi b. Mehmed.