Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 488 Hüküm no: 359 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofular mahallesindeki arsanın şehit Abbas Ağa’ya ait olduğunun tescil edildiği Husûs-ı âti’l-beyânın mahallinde ketb ü tahrîri iltimâs olunmağın taraf-ı şer‘-i enverden Mevlânâ Mehmed Efendi b. Mahmud nasb olunup ol dahi mahmiye-i İstanbul’da Sofular mahallesinde sâkine umdetü’l-muhadderât Atike Hatun bt. el-merhûm Abbas Ağa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre ahâlîsinden olup Dergâh-ı âlî -dâme-masûnen bi’l-avni’l-âlî- yeniçerileri ocağında kul kethüdâsı olduğu hâlde sene-i sâbıkada vâki‘ Nemçe keferesiyle Senta nâm mahalde Talur(?) ma‘rekesinde şehîden vefât eden merhûm-ı mezbûr Abbas Ağa b. Şahin Mehmed’in verâseti kebîre kızı mezbûre Atike Hatun ile sagīr oğlu Ebubekir Ağa’ya münhasıra olduğu şer‘an mukarrer oldukdan sonra müteveffâ-yı mezbûrun etbâ‘ından olup tâife-i mezbûrenin yirmi üç cemâ‘atinin hâlâ odabaşısı Halil Odabaşı b. Abdullah meclis-i <<şer‘de>> ma‘kūd-ı mezbûrda zâtı ta‘rîf-i şer‘î ile mu‘arrefe ve sagīr-i mezbûrun vasiye-i mansûbesi işbu hâfızatü’l-kitâb mezbûre Atike Hatun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Anber Çavuşzâde Süleyman Çelebi mülküne ve bir tarafdan Elharka(?) denmekle şehîr el-Hâc Ali veresesi mülklerine ve bir tarafdan ba‘zan Şahbaz Hatun bt. Abdullah mülküne ve ba‘zan tarîk-i âmma ve bir tarafdan tarîk-i hâssa müntehî etrâf-ı erba‘ası müceddeden taş duvar ile mebnî ve Sofular hamamı kurbünde vâki‘ çeşme suyunun fazlasından zikri âtî arsaya cârî mecrâsıyla muharrer(?) mâ-i cârîyi müştemil muhterik mülk menzil arsasını merhûm-ı mezbûr Abbas Ağa bundan akdem düyûnu terekesinden ezyed olduğu hâlde Bosna muhâfazasında vefât eden Abdullah Paşa’nın tesviye-i umûruna vasiyy-i muhtârı olan fahrü’l-a‘yân el-Hâc Mustafa Ağa b. Abdullah b. Abdülmennan tarafından müseccel vekîli Ahmed Beşe b. Mustafa’dan iki bin guruşa iştirâ ve semeni olan meblağ-ı merkūmu vekîl-i mezbûra tamâmen edâ ve teslîm etmekle meblağ-ı merkūm merhûm Abbas Ağa’nın kendi malı ve mebî‘-i mezkûr mülk-i müşterâsı olmuşidi lâkin bin yüz sekiz Receb-i şerîfi’nin beşinci günü târîhiyle müverraha mahmiye-i mezbûrede askerî kassâm olan umdetü’l-müderrisîni’l-kirâm Mehmed Efendi’nin <> imzâ ve hatmiyle mümzât ve mahtûme arsa-i mezkûrenin işbu mübâya‘a hücceti kendi üzerime mevâzi‘a tahrîr ettirdim ba‘de’l-yevm mebî‘-i mahdûd-ı mezkûrda ve semeninde benim kat‘â alâka ve medhalim yokdur verese-i merkūm-ı mezbûr Abbas Ağa’nın mülk-i müfevvezleri ve hakk-ı sırflarıdır diledikleri gibi mutasarrıflar olsunlar dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ba‘dehû ma‘an ba‘s olunan Muhzır Ahmed Çelebi b. Süleyman ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Hurrire fî 3 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Fahrü’l-akrân Hammâmîzâde Ahmed Ağa b. Mehmed, umdetü’l-müderrisîn Nasuh Ağazâde Hüseyin Efendi, Ali Efendi b. Mehmed, Mustafa Halîfe b. Yazıcı <>, Süleyman Ağa, Zahrü’l-emsâl Mehmed Ağa b. Ali, Hasan Beşe 36. Bölük, Şa‘bân Efendi.