Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 490 Hüküm no: 360 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden Yağlıkçı Hüseyin’de alacağı olduğunu ispat ettiği Mahmiye-i İstanbul’da Nevbahar mahallesi ahâlîsinden olup hâlâ Vilâyet-i Anadolu’da Hüdavendigâr sancağında sâkin Ebrûzâde denmekle şehîr Ahmed Ağa b. İbrahim Efendi b. Ahmed tarafından husûs-ı âti’l-beyânda vekîl olduğu mahalle-i mezbûre sükkânından Hasan Efendi b. İbrahim ve İsmail Çelebi b. Yusuf şehâdetleri ile mahzar-ı hasm-ı câhidde sâbit ve sübût-ı vekâletine hükmolunan bâ‘isü’l-vesîka Osman Efendi b. Şa‘bân mahfil-i kazâda mahmiye-i mezbûrede Tülbentçi Hüsam mahalesinde sâkin iken bundan akdem vefât eden Yağlıkçı el-Hâc Hüseyin b. Abdurrahman b. Nasrullah’ın zevce-i menkûha-i metrûkesi ve evlâd-ı sıgārının tesviye-i emrlerine vasiye-i mansûbeleri olmağla terekesine vaz‘-ı yed edip zâtı ta‘rîf-i şer‘î ile mu‘arrefe olan Fâtıma Hatun bt. Abdullah mahzarında üzerine bi’l-vekâle da‘vâ ve takrîr-i kelâm edip müvekkilim mezbûr Ahmed Ağa müteveffâ-yı mezbûr Yağlıkçı el-Hâc Hüseyin b. Abdurrahman b. <> Nasrullah’a işbu yedimde olan mümzâ ve mahtûm ve mu‘anven ve mersûm deyn temessüğü nâtık olduğu üzere kırk yedi bin yüz otuz bir sağ akçe ikrâz ve teslîm ol dahi iktirâz ve tesellüm ve mesârifine sarfla istihlâk edip ve yine eşyâ-i memlûkesinden her biri bin <> sağ akçeye olmak üzere otuz altı aded tansûh destârını otuz altı bin sağ akçeye ve dört Şam alacasını bin iki yüz sağ akçeye ve iki hilâlîyi altı yüz akçeye ve üç beyâz bogasiyi bin seksen akçeye ve bir top yemenîyi yüz seksen akçeye müteveffâ-yı mezbûra bey‘ u teslîm ol dahi iştirâ ve tesellüm edip cem‘an ciheteyn-i mezbûreteynden müvekkilim mezbûr Ahmed Ağa’ya zimmetinde ol kadar akçe deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden şâhidân-ı mezbûrân Hasan Efendi ve İsmail Çelebi ve mahmiye-i mezbûrede Fenâyî Dede mahallesinde sâkin Ramazan Beşe b. Abdurrahman li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr Yağlıkçı el-Hâc Hüseyin b. Abdurrahman b. Nasrullah hâl-i kemâl-i sıhhatinde fevtinden üç ay mukaddem müvekkil-i mezbûr Ahmed Ağa’ya ciheteyn-i mezbûreteynden seksen altı bin yüz doksan bir sağ akçe zimmetimde deynim var deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde zikr olunan şâhidleri kıbel-i şer‘den tezkiye içün Mevlânâ Abdurrahman Efendi b. el-merhûm Ahmed Efendi irsâl olunup ol dahi zikr olunan Nevbahar mahallesine varıp ahâlîsinden Mehmed Efendi b. Ahmed ve el-Hâc Mehmed b. Hüseyin [ve] İsmail Ağa b. Mehmed ve el-Hâc Osman b. Abdullah’dan şâhidân-ı mezbûrân Hasan Efendi ve İsmail Çelebi’yi tezkiye-i tefahhus ettikde her biri adller ve makbûlü’ş-şehâdelerdir deyü haber verdiklerini ve sâniyen zikr olunan Fenâyî mahallesine varıp ahâlîsinden İbrahim b. Yusuf ve Receb Çelebi b. Ali ve Ahmed Çelebi b. Receb ve Mehmed b. Abdullah’dan şâhid-i mezbûr Ramazan Beşe’yi tefahhus ettikde her biri adl ve makbûlü’ş-şehâdedir deyü haber verdiklerini mahallinde tahrîr ba‘dehû [ma‘an] irsâl olunan Ahmed Çelebi b. Süleyman ile meclis-i şer‘a gelip alâ-vukū‘ihi inhâ ve takrîr etmeğin mevkūfen alâ-yemînü’l-müvekkili’l-mezbûr mûcebiyle ba‘de’l-hükm mâ-vaka‘a kayd-şüd. Fî 20 Rebî‘ülevvel sene 1110 Şuhûdü’l-hâl: Yahya Efendi b. Mustafa, Rûşenî Mehmed Efendi b. İbrahim, Mehmed Ağa b. Abdullah, Ahmed Çelebi b. Süleyman, İbrahim Çelebi b. Mehmed.