Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 491 Hüküm no: 362 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden kocası Bostancı Mustafa Efendi’den evin yarısını satın aldığını ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘den me’zûnen irsâl olunan Mevlânâ el-Hâc Abdurrahim Efendi b. Mustafa mahmiye-i İstanbul’da Demirkapı kurbünde Dâye Hatun mahallesinde sâkin iken bundan akdem vefât [eden] bostânî mütekā‘idlerinden Mustafa Efendi b. Abdullah b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zâhirde zevce-i menkûha-i metrûkesi Râbia Hatun bt. Abdullah’dan gayrı vâris-i ma‘rûfu olmamağla terekesinin rub‘u mezbûreye ve selâse-i erbâ‘ı cânib-i beytülmâle âid oldukdan sonra mahmiye-i mezbûrede bi’l-fi‘il bostancıbaşı ve tâife-i mezbûrenin beytülmâllerini zabta bâ-hatt-ı hümâyûn-ı sa‘âdet-makrûn memûr olan umdetü’l-havâs ve’l-mukarrebîn mu‘temedü’l-mülûk ve’s-selâtîn izzetlü Mustafa Ağa b. Mehmed’in kuşçubaşısı ve tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn olan fahrü’l-akrân Osman Bey b. Süleyman meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olup zâtı mahalle-i mezbûrede sâkin Müezzin Ahmed Çelebi b. Abdullah ve Demirtaş mahallesinde sâkin fahrü’l-müderrisîni’l-kirâm Mehmed Efendi b. Mustafa ta‘rîfleriyle mu‘arrefe hâfızatü’l-kitâb mezbûre Râbia Hatun mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı olduğu müsbet olup mahalle-i mezbûrede vâki‘ hâriciye ve dâhiliyesi büyût-ı adîdeyi muhtevî inde’l-ahâlî ve’l-cîrân ma‘lûmü’l-hudûd ve’l-müştemilât nısf mülk menzilin rub‘u zevcesi mezbûre Râbia’ya ve selâse-i erbâ‘ı cânib-i beytülmâle âid olmuş iken mezbûre Râbia menzil-i mezbûra müstakilleten bi-gayr-ı hakkın vaz‘-ı yed eder suâl olunsun dedikde gıbbe’s-suâl mezbûre Râbia Hatun cevâbında [90b] zevcim müteveffâ-yı mezbûr Mustafa Efendi b. Abdullah b. Abdullah hâl-i kemâl-i sıhhatinde cemî‘ tasarrufâtı nâfiz iken fevtinden bir sene mukaddem zikr olunan nısf menzilini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile bana yüz elli guruşa huzûr-ı Müslimînde bey‘ u temlîk ben dahi iştirâ ve temellük ve tesellüm ve kabûl edip semeni olan <> meblağ-ı mezbûrun yüz guruşunu zevcim mezbûr zimmetinde hakkım olan yüz guruş mehrime takas ve elli guruşunu dahi cihet-i karzdan zimmetinde elli guruş hakkıma takas ettikde ben dahi mukāssa ve kabûl etmekle menzil-i mezbûrun nısf-ı şâyi‘i benim mülk-i müşterâm olmuşdur deyü def‘le mukābele edicek gıbbe’l-istintâk ve’l-inkâr mezbûre Râbia’dan def‘-i mezbûruna beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân Müezzin Ahmed Çelebi b. Abdurrahim ve merkūm Mehmed Efendi b. Mustafa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr <> Mustafa Efendi b. Abdullah b. Abdullah hâl-i kemâl-i sıhhatinde fevtinden bir sene mukaddem cemî‘ tasarrufâtı nâfiz iken mülkünde iken menzil-i mahdûd-ı mezkûrun nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz elli guruşa mezbûre Râbia Hatun’a huzûrumuzda bey‘ u teslîm ol dahi iştirâ ve tesellüm ve kabz edip semeni olan meblağ-ı mezbûrun yüz guruşunu zevci zimmetinde olan yüz guruş mehrine ve elli guruşunu dahi cihet-i karzdan zimmetinde elli guruş hakkına takas ettikde ol dahi mukāssa ve kabûl etmekle menzil-i mezbûrun nısfı mezbûre Râbia’nın mülk-i müşterâsıdır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ [hâli] mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Abdullah ve Mehmed b. Abdullah ile meclis-i şer‘a gelip vukū‘ üzere inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Rebî‘i’l-evvel li-seneti aşer ve mi’ete ve elf. Şuhûdü’l-hâl: İbrahim Efendi b. Hüseyin, Ahmed Efendi b. İbrahim, Yusuf Efendi b. Mustafa, el-Hâc Mehmed Ağa b. Sinan, Süleyman b. Abdurrahman.