Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 494 Hüküm no: 364 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden eşi Bostancı Mustafa Efendi’ye ait nısf menzilin bir kısmını satın aldığı Kezâlik işbu hâfızatü’l-kitâb mezbûre Râbia Hatun mahzarında bi’l-vekâle ikrâr ve takrîr-i kelâm edip mevlânâ-yı mezbûr Mustafa Efendi’nin ile’l-vefât yedinde mülk ve hakkı olduğu müsbet olup mahalle-i Dâye Hatun’da vâki‘ bir tarafdan Sarı Osman Ağa b. Mehmed’in tasarrufunda olup hâlâ veresesi yedlerinde olan nısf menzile ve bir tarafdan imâma meşrûta vakıf menzile ve bir tarafdan Haremeyn-i şerîfeyn vakf-ı şerîfinden Âişe Hatun bt. Abdullah tasarrufunda olan vakıf menzile ve bir tarafdan tarîk-i âmma müntehî dâhiliyesinde fevkānî iki bâb oda ve bir sofa ve tahtında bir matbah ve bir kenîf ve bi’r-i mâ ve havluyu ve hâriciyesinde fevkānî bir bâb oda ve bir kenîf ve muhavvatayı müştemil nısf mülk menzilin selâse-i erbâ‘ı cânib-i beytülmâle âid olup şer‘an bey‘i lâzım gelmeğin bi’l-izni’ş-şer‘î zikr olunan nısf mülk menzilin selâse-i erbâ‘ı sûk-ı sultânîde <> mecma‘-ı nâs olan mevâzi‘de kirâren ve mirâren ba‘de’l-müzâyede ba‘de inkıtâ‘i’r-rağbe mezbûre Râbia Hatun üzerinde para üç akçe hesâbı üzere on üç bin beş yüz akçede karâr edip ziyâde ile tâlib-i âhar zuhûr etmeyip ve meblağ-ı mezbûr yevm-i akdde zikr olunan selâse-i erbâ‘ın semen-i misli olduğu lede’ş-şer‘i’ş-şerîf zâhir ve mütehakkik olmağın tarafeynden îcâb ve kabûlü hâvî bey‘-i bâtt-ı sahîh-i şer‘î ile zikr olunan selâse-i erbâ‘ı bi-cümleti’t-tevâbi‘ ve’l-levâhık mezbûre Râbia Hatun’a on üç bin beş yüz sağ akçeye bi’l-vekâle bey‘ u temlîk ve teslîm ol dahi ber-vech-i muharrer iştirâ ve tesellüm ve kabûl edip semeni olan meblağ-ı mezbûru terekeden olmak üzere mezbûre Râbia yedinden tamâmen ahz u kabz eyledim ba‘de’l-yevm zikr olunan nısf mülk menzilin selâse-i erbâ‘ı mezbûre Râbia Hatun’un mülk-i müşterâsı olup keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli kezâlik. Şuhûdü’l-hâl: Es-sâbikūni’ş-şâhidûn es-sâbikūn.