Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 494 Hüküm no: 365 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin varislerinin mehir ve miras davasında sulh oldukları Mahmiye-i İstanbul’da Kum[kapı] kurbünde Çadırcı Ahmed mahallesinde sâkin iken bundan akdem vefât eden Mustafa Çelebi b. Abdülgaffar’ın verâseti zevce-i menkûha-i metrûkesi Saliha Hatun bt. Abdullah ile kebîr oğlu Yakub Çelebi’ye münhasıra ve tashîh meselesi sekiz sehmden olmağla sihâm-ı mezbûrenin bir sehmi zevcesi mezbûre Saliha Hatun’a ve bâkī yedi sehmi oğlu mezbûr Yakub Çelebi’ye isâbeti tahakkukundan sonra zâtı Kâtib Sinan mahallesinde sâkin Kâğıdcı Mustafa Çelebi b. Mehmed ve Kuyumcu Bahşayiş mahallesinde sâkin Mehmed Efendi b. Mustafa ta‘rîfleriyle mu‘arrefe olan mezbûre Saliha Hatun mahfil-i kazâda kebîr oğlu hâfızü’l-kitâb mezbûr Yakub Çelebi mahzarında ikrâr ve takrîr-i kelâm edip zevcim müteveffâ-yı mezbûrun zimmetinde mütekarrir olan ve sağ altı bin <> akçe mehr-i müeccelim [91a] ve defter-i kassâm-ı askerî mûcebince ba‘de ihrâci’l-mesârif hisseme isâbet eden beş bin beş yüz doksan akçe min-haysü’l-mecmû‘ on bir bin beş yüz doksan akçe hakkımı terekesine vaz‘-ı yed eden oğlum mezbûr Yakub Çelebi’den da‘vâ ettiğimde ol dahi hâr[ic] ez defter-i mezbûr mecmû‘u üç yüz guruş kıymetli bir incili serpûş ve bir incili enselik ve bir incili saçlık ve üç kumaş mak‘ad ve bir kumaş perde ve bir çuka kapı perdesi ve bir cevâhir ön kuşak ve on altın düğme ve on inci düğme ve bir çift üçer ayaklı zümrüd inci askılı küpe ve bir telli kaftan ve yetmiş miskāl inci ve iki çatma döşek ve iki çift kadife yastık ve üç minderi benden ketm ü ihfâ ettikde ben dahi inkâr eylediğimde beynimize muslihûn tavassut edip oğlum mezbûr Yakub Çelebi da‘vâ-yı mezkûresinden fâriğ olmak üzere hakkım olan meblağ-ı merkūmun iki bin dört yüz akçesini bana vermek üzere sulh olup bedel-i sulh olan meblağ-ı mezbûru bana teslîm edip mâ‘adâ dokuz bin yüz doksan akçeden ve terekeden hisseme isâbet eden cemî‘ mîrâs da‘vâsından oğlum mezbûr Yakub Çelebi’nin zimmetini ibrâ-i âmm-ı katı‘u’n-nizâ‘ ile ibrâ ve iskāt eyledim ve oğlum mezbûr Yakub Çelebi dahi da‘vâ-yı mezkûresinden ve terekeden defter-i mezbûr mûcebince ba‘de ihrâci’l-mesârif hissesini tamâmen ahz eyledikden sonra hâric ez defter-i mezbûr hissesine isâbet eden âmme-i mîrâs da‘vâsından benim zimmetimi ibrâ-i âmm-ı katı‘u’l-hısâm ile ibrâ ve iskāt eyledi dedikde gıbbe’t-tesâduki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Fahrü’l-müderrisîni’l-kirâm Abdülmuti Efendi, Mukayyid Mustafa Efendi b. Mehmed, Rûşenî Mehmed Efendi b. el-merhûm İbrahim Efendi, Mehmed Efendi b. el-Hâc Sunullah.