Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 632 Hüküm no: 787 Orijinal metin no: [142b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul ve bağlı yerler koyun kasapları kethüdâlığına Veli Kilârî’nin tayini Ebnâ-i sipâhiyândan Yirmi birinci bölükde yevmî kırk iki akçe ulûfeye mutasarrıf olan işbu râfi‘-i tevkī‘-i refî‘ü’ş-şân-ı şehriyârî kıdvetü’l-emâsil ve’l-akrân Veli Kilârî -zîde kadruhû- arzuhâl sunup İstanbul’da vâki‘ koyun kasablığı kethüdâsı olan İbrahim fevt olup [yeri] mahlûl olmağla ulûfesi mukābelesinde kendiye verilmek bâbında inâyet recâ etmeğin mutasarrıf olduğu kırk iki akçe ulûfesi hazîne-mânde olup mukābelesinde tevcîh olunup berât-ı şerîf verilmek recâsına inâyet recâ etmeğin hakkında mezîd-i inâyet-i pâdişâhânem vücûda getirip kendi arzuhâli ile bin doksan yedi Cemâziyelâhiri’nin yedinci günü târihiyle müverrah verilen ruûs-ı hümâyûnum sûreti mûcebince tevcîh edip bu berât-ı hümâyûn-ı sa‘âdet-makrûnu verdim ve buyurdum ki mezkûr Veli Kilârî -zîde kadruhû- varıp hazîne-mânde eylediği kırk iki akçe sipâhilik ulûfesi mukābelesinde İstanbul’da vâki‘ koyun kasabları kethüdâsı olup bundan evvel kethüdâ olanlar ne minvâl üzre mutasarrıf olıgelmişler ise mûmâ-ileyh Veli Kilârî dahi ol minvâl üzre mutasarrıf ola, ol bâbda efrâd-ı âferîdeden bir ferd mâni‘ ve müzâhim olmayıp dahl ve ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’l-hâdî aşer min şehri Cumâdelâhire sene seb‘a ve tis‘în ve elf. Be yurd-ı sahrâ-yı Edirne. Sah Elinde olan berâtı mûcebince zabt ettirilip âharı müdâhale ettirilmeye deyû buyruldu. Fî 19 B [Receb] [10]97. Arzuhâl Sa‘âdetlü ve merhametlü sultânım hazretleri sağ olsun Bu kulları zümre-i sipâhiyândan kırk iki akçe ulûfeye mutasarrıf olup hâliyâ sâhib-i devlet hazretleri ekmeğim mukābelesinde İstanbul’un kasablar kethüdâlığı berât-ı âlîşân ile sadaka ve ihsân olunup Sultânımdan mercûdur ki manzûr-ı âlî buyurulup zabt ettirilmek bâbında fermân-ı şerîf recâ olunup bâkī fermân sultânımındır. Bende Veli