Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 633 Hüküm no: 788 Orijinal metin no: [143a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul ihtisab çardağı kuloğlanları yiğitbaşılığına ihtiyarlarından Hacı Süleyman’ın tayin edilmesi Mezbûr temessük huzûrumuza ihzâr olunmak buyruldu. Sah İstanbul kadısı fazîletlü Efendi kadîmden ne vechile istihdâm olınagelmiş ise yine ol vechile istihdâm ettiresin deyû buyruldu. İstanbul kadısı fazîletlü Efendi hazretleri Kadîmîsi ne vechiledir suâl ve tefahhus edip arz eyleyesin deyû buyruldu. Arz-ı dâ‘îleridir ki İstanbul kadıları ve es‘âr nâibleri ve muhtesib ağaları kadîmden olıgeldiği üzre kendiler terâzibaşı ta‘yîn etmeyip kuloğlanı terâzibaşılarından biri beher yevm münâvebe ile istihdâm etmek üzredir, ecânibden kimesne müdâhale etmemişdir İstanbul kadıları ma‘rifetleriyle içlerinden biri yiğitbaşı olup ve anlara mahsûs bir şey yoktur hattâ husûs vech-i meşrûh üzre tahrîr-i cedîd defterinde tastîr olundukda bu minvâl üzre amel olunmak için fermân-ı âlî dahi sâdır olmuşdur. Fermân men lehü’l-emrindir. Sa‘âdetlü ve Merhametlü Sultânım hazretleri sağ olsun Arzuhâl-i fukarâları oldur ki bu fukarâ kulları İstanbul’da vâki‘ ihtisâb çardağı hizmetlerinde kuloğlanları fukarâları olup cennet-mekân firdevs-âşiyân merhûm ve mağfûrun-leh Sultan Süleyman Hân hazretlerinin zamân-ı şerîflerinde bu âna değin hizmetinde olup içinde bir müstakīm ve emvâl-i ihtisâb olan İstanbul kadısı cümle ihtiyârlarımız ma‘rifetleriyle bu âna değin ecânibden kat‘â kimesne dahl etmiş değiller iken âhardan Osman nâm kimesne ve sipâhi esâmîsin hazîne-mânde edip yiğitbaşı olmuş merhametlü sultânımdan mercûdur ki bu fukarâların hâllerine merhamet buyurulup hilâf-ı kānûn olmağla ol makūle zulm üzerimizden men‘ ü def‘ olunmak recâsına arzuhâl olunup ve husûs-ı mezbûr olagelmiş değildir. Zirâ [e]cânib malını beher yevm İstanbul dekâkînlerinden altı bin otuzar akçeye her birimiz kefîlleriz ecânib karışır ise mâl-ı mîrîye noksân ve te‘addî olunur. Bu bâbda emr ü fermân sa‘âdetlü sultânımdır. Bende Kuloğlanları İhtiyâr fukarâları Yiğitbaşılık-ı Çardak-ı İstanbul İstanbul’da İhtisâb çardağı hüddâmından kuloğlanları meclis-i şer‘a varıp kadîmü’l-eyyâmdan beri ihtiyârları yiğitbaşı olıgelmekle işbu sene dahi yiğitbaşı ihtiyârları bildikleri Hacı Süleyman’ın mahall ü müstahık olmağın vermek recâsına fazîletlü İbrahim Efendi arz etmekle mûcebince verilmek buyruldu. fî 19 C[emâziyelâhir] sene 1097.