Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 497 Hüküm no: 368 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacıbaşı Ahmed Ağa’nın varislerinin, mûrislerinden intikal eden evi Ali Ağa’ya sattıkları Husûs-ı âti’l-beyânın mahallinde ketb ü tahrîri’çün savb-ı şer‘den Mevlânâ Mehmed Efendi b. Sunullah mahmiye-i İstanbul’da <> Mimârayas mahallesinde el-Hâc Mehmed b. Ahmed’in menziline varıp akd-i meclis ettikde mahalle-i mezbûrede sâkin iken bundan akdem vefât eden Arabacıbaşı Ahmed Ağa b. Ali b. Abdullah’ın verâseti zevce-i menkûha-i metrûkesi Hamide Hatun bt. el-Hâc Hüseyin’e ve kebîre kızları Rukiye ve Emetullah’a ve sagīr oğulları Ali ve Mustafa’ya münhasıra ve tahsîs meselesi kırk sekiz sehmden olmağla sihâm-ı mezbûrenin altı sehmi zevcesi mezbûreye ve bâkī kırk iki sehmin <> yedişer sehmi kızları mezbûrelerden her birine ve on dörder sehmi oğulları mezbûrlardan her birine isâbeti tahakkukundan sonra zâtları mahalle-i mezbûrede sâkin İmâm İbrahim Efendi b. Mehmed ve el-Hâc Ahmed b. Mustafa ta‘rîfleriyle mu‘arrefe olan zevcesi mezbûre Hamide Hatun ile kebîre kızı mezbûre Rukiye Hatun asâleten ve mezbûre Rukiye Hatun li-ebeveyn kız karındaşı mezbûre Emetullah Hatun bt. el-mezbûr Ahmed Ağa b. Ali tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mu‘arrifân-ı merkūmân şehâdetleri ile sâbit ve sübût-ı vekâletine hükmolunmağla vekâleten meclis-i mezbûrda hâfızü’l-kitâb Ali Ağa b. İsmail mahzarında her biri takrîr-i kelâm edip müteveffâ-yı mezbûrun hîn-i fevtine gelince yedinde mülk ve hakkı olduğu müsbet olan mahalle-i mezbûrede vâki‘ bir tarafdan Abdullah Ağa mülkü ve bir tarafdan Nakkaş Hüseyin mülkü ve bir tarafdan Dikici Mehmed menzili ve bir tarafdan tarîk-i âmma müntehî dâhiliyesi fevkānî iki bâb oda ve bir sofa ve bir kiler ve tahtânî bir oda ve bir matbah ve bir kiler ve taht[e’l-]arzda bir mahzen ve bir su kuyusu ve zât-ı eşcâr cüneyne ve havluyu ve hâriciyesi fevkānî bir bâb oda ve bir ahır ve bir su kuyusu ve bir kenîfi müştemil mülk menzil münâdîlerden el-Hâc Yusuf yediyle sûk-ı sultânîde altı ay mikdârı nidâ ve müzâyede olunup rağabât-ı nâs münkatı‘a oldukdan sonra mezbûr Ali Ağa üzerinde sekiz yüz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr yevm-i akdde semen-i misli olduğu mahalle-i mezbûre ahâlîsinden mezbûr İmâm İbrahim Efendi ve el-Hâc Ahmed Çelebi ve Hüseyin Çelebi b. İbrahim ve Kâmil Beşe b. Ömer haberleri ile lede’ş-şer‘ zâhir oldukdan sonra menzil-i mezbûrdan tashîh-i mezbûr üzere bize intikāl eden yirmi sehm-i şâyi‘amızı tarafeynden îcâb ve kabûlü hâvî bey‘-i kat‘î ile semen-i mezkûrdan bizim hissemize isâbet eden üç yüz otuz üç guruş ve bir sülüs guruşa kâffe-i hukūk ve merâfıkı ile mezbûr Ali Ağa’ya bey‘ u teslîm ol dahi iştirâ ve tesellüm edip semeni olan meblağ-ı mezbûru ba‘de’l-hısâs tamâmen alıp kabz eyledik ba‘de’l-yevm mebî‘-i şâyi‘-i mezbûr mezbûr Ali Ağa’nın mülk-i müşterâsı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîk zikr olunan sagīrlerin tesviye-i emrlerine vasiyy-i muhtârları Mustafa Çelebi b. Mehmed meclis-i mezbûrda mezbûr Ali Ağa mahzarında bi’l-vesâye ikrâr edip menzil-i mahdûd-ı mezbûrdan zikr olunan sagīrlere tashîh-i mezbûr [üzere] isâbet eden yirmi sekiz sehm-i şâyi‘lerini kendilere nef‘ ve yarar vech üzere ifrâz mümkün olmayıp nafaka ve kisveye dahi zarûretleri olmağla sehm-i şâyi‘-i mezkûrlarını vesâyetim hasebiyle semen-i mezbûrdan hisselerine isâbet eden dört yüz altmış yedi guruş ve bir zolotaya mezbûr Ali Ağa’ya bey‘ u teslîm ol dahi iştirâ ve tesellüm edip semeni olan meblağ-ı mezbûru yedinden tamâmen alıp kabz eyledim ba‘de’l-yevm mebî‘-i şâyi‘-i mezbûr mezbûr Ali Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Nasuh Çelebi b. Yusuf ve Mehmed Beşe b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd-şüd. Fî 8 min-Rebî‘i’l-âhir sene aşer ve mi’ete ve elf. Şuhûdü’l-hâl: Müezzin Mustafa Efendi b. Musa, İmâm İbrahim b. Mehmed, el-Hâc Ahmed b. Mustafa, Kâmil Beşe b. Ömer, Ahmed Beşe b. Osman.