Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 500 Hüküm no: 370 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın müteveffa kardeşi Trablus Valisi Hamza Paşa’da alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen Mevlânâ Abdurrahman Efendi b. el-müvellâ el-merhûm Ahmed Efendi irsâl olunup ol dahi mahmiye-i İstanbul’da Kadırga limanı kurbünde Şehsuvar mahallesi ahâlîsinden olup bundan akdem Trablusşam vâlisi iken vefât eden merhûm Hamza Paşa b. Sinan b. Abdullah’ın menziline varıp zeyl-i kitâbda mastûrü’l-esâmî <> Müslimîn huzûrlarında akd-i meclis-i şer‘-i nebevî eyledikde müteveffâ-yı müşârün-ileyhin verâseti zevce-i menkûha-i metrûkesi umdetü’l-muhadderât zübdetü’l-muvakkarât Saliha Hanım bt. el-merhûm Kiremidçi Mustafa Ağa ve kebîr oğlu Yusuf Bey ile kebîre kızı Emin Hanım’a münhasıra oldukdan sonra müteveffâ-yı müşârün-ileyhin dâyini ve li-ebeveyn karındaşı fahrü’l-a‘yân hâfızü’l-kitâb Mehmed Ağa b. el-merhûmü’l-mezbûr Sinan Ağa meclis-i <<şer‘de>> ma‘kūd-ı mezbûrda müteveffâ-yı müşârün-ileyhin düyûnu terekesinden ezyed <> olmağın vereseleri terekesinden kasr-ı yed etmeleri ile tesviye-i umûr-ı müteveffâ-yı mezbûra bâ-hüccet-i şer‘iyye vasî ve kayyım [nasb] olunan mahalle-i mezbûrede sâkin Hürrem Efendi b. Salih mahzarında üzerine da‘vâ ve takrîr-i kelâm edip bin doksan dokuz senesinde karındaşım müteveffâ-yı müşârün-ileyh Mısr-ı Kāhire vâlisi iken kendi malımdan dört bin aded yaldız altını müteveffâ-yı mezbûra ikrâz ve teslîm ol dahi yedimden iktirâz ve kabz mesârifine sarf ile istihlâk edip ve ba‘de’l-azl bin yüz senesinde paşa-i müşârün-ileyh Şam-ı şerîfe geldikde vukıyesi birer guruşa olmak üzere sekiz bin vukıye kahve dahi sekiz bin guruşa karındaşım müteveffâ-yı müşârün-ileyhe bey‘ u teslîm ol dahi iştirâ ve tesellüm edip zikr olunan meblağ-ı mezbûr dört bin yaldız altını ile semen-i mebî‘-i mezbûr sekiz bin guruşu bana edâ etmeden fevt olmağla vasiyy-i mezbûrun yedinde olan tereke-i kāsırasından taleb ederim suâl olunsun dedikde gıbbe’s-suâl ve’l-inkâr müdde‘î-i mûmâ-ileyhden müdde‘âsına beyyine taleb olundukda udûl-ı ahrâr-ı ricâl-i Müslimînden müteveffâ-yı müşârün-ileyhin etbâ‘ından mahalle-i mezbûrede sâkin el-Hâc Yusuf Ağa b. Abdullah ve mahmiye-i mezbûrede Seydi Ömer mahallesinde sâkin el-Hâc Mustafa b. Ebubekir ve Laleliçeşme kurbünde Mesihpaşa-i atîk mahallesinde sâkin İvaz Ağa b. Nuh li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-vâki‘ işbu müdde‘î-i mezbûr Mehmed Ağa târîh-i mezbûrda karındaşı müteveffâ-yı müşârün-ileyh Hamza Paşa b. Sinan b. Abdullah Efendi Mısır vâlisi iken kendi malından dört bin yıldız altını müteveffâ-yı müşârün-ileyhe huzûrumuzda ikrâz ve teslîm ol dahi iktirâz ve kabz edip mesârifine sarf ile istihlâk eyledi ve ba‘de’l-azl bin yüz senesinde Şam-ı şerîfe geldikde vakıyesi birer guruşa olmak üzere sekiz bin vukıye kahvesini dahi sekiz bin guruşa müteveffâ-yı müşârün-ileyhe bey‘ u teslîm ol dahi iştirâ ve tesellüm ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i [şer‘iyye] edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Çukadâr el-Hâc Süleyman b. Hasan ve Mustafa Çelebi b. Ali ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd-şüd. Hurrire fî 9 min-şehri Rebî‘i’l-âhir li-seneti aşer ve mi’ete ve elf. Şuhûdü’l-hâl: Fahrü’l-müderrisîn İbrahim Efendi b. Davud eş-şehîr-i Melek, fahrü’l-eşbâh Yusuf Efendi b. ( ) Nâzır Tophane, fahrü’l-akrân Ömer Ağa b. İbrahim silahdâr-ı paşa-i merkūm sâbık, Mustafa Efendi b. Mehmed İmâm-ı mahalle-i mezbûre, el-Hâc Ahmed b. Mehmed, el-Hâc Mustafa b. ( ), el-Hâc Mehmed b. Mustafa Çukadâr, Hacı Receb Ağa b. Abdullah, Mehmed Çelebi b. Ali, Mehmed Çelebi b. Abdullah.