Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 501 Hüküm no: 371 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Keresteci İbrahim’in varislerinin miras evi satmalarına izin verildiği Mahmiye-i İstanbul’da Hoca Halil Attâr mahallesinde sâkin iken bundan akdem vefât eden Keresteci el-Hâc İbrahim’in sagīr oğlu Salih’in tesviye-i umûruna kıbel-i şer‘den vasiye-i mansûbesi ve vâlidesi olup zâtı mahalle-i mezbûrede sâkin Abdullah Beşe b. Hasan ve Mehmed Beşe b. Osman ta‘rîfleriyle mu‘arrefe olan hâfızatü’l-kitâb Râbia Hatun bt. İbrahim meclis-i şer‘de takrîr-i kelâm ve bast ani’l-merâm edip müteveffâ-yı mezbûrun mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd icâreteyn-i ma‘lûmeteyn ile Haremeynü’ş-şerîfeyn vakfından ile’l-vefât taht-ı tasarrufunda olan menzili ba‘de vefâihi kebîr oğlu Süleyman ile sagīr-i mezbûra intikāl ettikden sonra mezbûr Süleyman menzil-i mezkûrdan hisse-i şâyi‘asını âhara ferâğ ve tefvîz murâd etmekle sagīr-i mezbûrun hisse-i şâyi‘asını kendüye nef‘ ve yarar vech üzere ifrâz mümkün olmamağla ba‘de’l-müzâyede ma‘rifet-i mütevellî ve bedel-i misli ile âhara ferâğ ve tefvîze kıbel-i şer‘den me’zûn olmak matlûbumdur dedikde vasiye-i mezbûrenin kelimât-ı meşrûhası vâki‘a mutâbıka olduğu zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enveri’l-mutahhar zâhir ve mukarrer olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri vech-i muharrer üzere vasiye-i merkūmeye ferâğ ve tefvîze izin vermeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Rebî‘i’l-evvel li-seneti aşer ve mi’ete ve elf. Şuhûdü’l-hâl: İmâm Mustafa Efendi b. ( ), Abdullah b. Hasan, Mehmed Çelebi b. Ahmed, Hacı Bekir b. Ali, Abdullah b. Mehmed, Muslu Beşe b. Mustafa, Mehmed b. Osman diğer Mehmed b. Osman, Süleyman Çelebi b. Mehmed, Mehmed Çelebi b. Hüsrev, Suhte Hacı Mustafa b. Hüseyin, Halil Beşe, Süleyman Çelebi b. Mehmed.