Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 502 Hüküm no: 372 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mustafa Efendi’nin müteveffa Ali Efendi’deki alacağının bir kısmını Ali Efendi Vakfı’ndan aldığı Mahmiye-i İstanbul’da Nişancı Paşa-i atîk mahallesi sükkânından İmâm Mustafa Efendi b. Receb meclis-i şer‘de mahmiye-i mezbûrede Ayasofya kurbünde Üskübî mahallesi ahâlîsinden olup Mekke-i Mükereme şerefehallâhu te‘âlâ kazâsından ma‘zûlen vedâ‘-ı âlem-i fânî eden merhûm Ali Efendi b. el-Hâc Hüseyin’in hayâtında kehüdâsı ve nukūd-ı mevkūfesine bi’l-fi‘il mütevellî olan hâfızü’l-kitâb el-Hâc Mustafa Ağa b. Mehmed muvâcehesinde ikrâr ve takrîr-i kelâm edip müteveffâ-yı mûmâ-ileyh Ali Efendi vefât edip terekesi tahrîr ve ba‘de’l-ihrâcât bâkī kalan terekesinden sülüs-i malını müteveffâ-yı mezbûrun vakfı içün mütevellî-i mezbûr ahz u kabz ve bâkīsi veresesi beyninde taksîm olundukdan sonra işbu yedimde olan hükm hücceti mûcebince on bir aded kitâb semeninden müteveffâ-yı mezbûr zimmetinde beş yüz yedi guruş hakkım vardır deyü iddi‘â ve isbât etmekle meblağ-ı mezbûrun üç yüz otuz sekiz guruşu veresinden ve yüz altmış dokuz guruşu vakfeylediği akçeden lâzım gelmeğin meblağ-ı mezbûr yüz altmış dokuz guruşu mütevellî-i mezbûr Mustafa Ağa yedinden tamâmen alıp kabz eyledim meblağ-ı mezbûrdan merkūm Mustafa Ağa yedinde bir akçe ve bir habbe bâkī kalmadı dedikde mâ-vaka‘a kayd-şüd. Şuhûdü’l-hâl: Hâfız Mehmed Efendi b. Ahmed, Mehmed Çavuş b. Abdurrahman, İbrahim Çelebi b. Mehmed, el-Hâc Mustafa b. Mehmed.