Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 634 Hüküm no: 789 Orijinal metin no: [143b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’de bulunan İstanbullu yahudilere Kira oğlu Arslan’ın yiğitbaşı tayini Düstûr-ı mükerrem, müşîr-i müfahham, nizâmü’l-âlem, müdebbir-i umûri’l-cumhûr, bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-sa‘âdeti ve’l-iclâl, el-muhtas bi sunûfi avâtıfi’l-meliki’l-a‘lâ Âsitâne-i sa‘âdetimde bi’l-fi‘l vezâret-i uzmâ ve vekâlet-i kübrâ kāimmakāmı olan vezîrim Receb Paşa -edâmallâhu te‘âlâ iclâlehû- ve a‘lemü’l-ulemâ’i’l-mütebahhirîn, efdalü’l-fuzalâ’i’l-müteverri‘în, yenbû‘ü’l-fezâili ve’l-yakīn, keşşâfü’l-müşkilâti’d-dîniyye, hallâlü’l-mu‘dilâti’l-yakīniyye, miftâhu künûzi’d-dekāyık, misbâhu’r-rumûzi’d-dekāyık, mahfûfu bi sunûfi avâtıfi’l-meliki’l-a‘lâ Anadolu kazaskerliği pâyesiyle bi’l-fi‘l İstanbul kadısı olan Mevlânâ İbrahim -edâmallâhu te‘âlâ fezâilühû- tevkī‘-i refî‘-i hümâyûn vâsıl olucak ma‘lûm ki Kira oğlu Arslan nâm yahudi Ordu-yı hümâyûnuma arzuhâl sunup mezbûr yahudi iki seneden beri cemâ‘atbaşıları ma‘rifetiyle Edirne’de olan İstanbul yahudi[si]nin kethüdâsı olup hâlâ İstanbul’a gidip kimesneye te‘addîsi yoğiken ( ) ve ( ) ve ( ) nâm yahudiler biz senin kethüdâ olduğunu istemeziz deyû bî-vech te‘addî üzre olduklarını bildirip ol bâbda hükm-i hümâyûnum recâ etmeğin ol vechile te‘addî ettirmemek emrim olmuşdur. Buyurdum ki hükm-i şerîfimle vusûl buldukda bu bâbda sâdır olan emrim üzre husûs-ı mezbûru tamâm mukayyed olup göresin arz olduğu üzre ise mezbûrlara Arslan Yahudi kethüdâ olup kimesneye bir zarar ve te‘addîsi yoğiken mezbûrlar bî-vech sana kethüdâlık ettirmeyiz deyû te‘addî eyledikleri vâki‘ ise men‘ ü def‘ ettirip min ba‘d şer‘-i şerîfe ve emr-i hümâyûna muhâlif kimesneye iş ettirmeyesin şöyle bilesin alâmet-i şerîfe i‘timâd kılasın. Tahrîren fî evâili şehri Cumâdelâhire li sene seb‘a ve tis‘în ve elf. Be sahrâ-yı Edirne.