Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 635 Hüküm no: 790 Orijinal metin no: [143b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul için Hudâvendigâr’dan satın alınan zahirenin kontrolü fermanı Düstûr-ı mükerrem, müşîr-i müfahham, nizâmü’l-âlem müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-sa‘âdeti ve’l-iclâl, el-mahfûfu bi sunûfi avâtıfi’l-meliki’l-a‘lâ hâlâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmı olan vezîrim Receb Paşa -edâmallâhu te‘âlâ iclâlehû- ve akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki bin doksan altı senesine mahsûb olmak üzre Hüdâvendigâr sancağının iştirâ zahîresi mübâşiri Halil -zîde kadruhû- livâ-i mezbûrdan iştirâ eylediği zahîreyi Âsitâne’ye getirip sâbıkan gümrük emîni Abidin Paşa’ya fermân olduğu üzre gümrük hüddâmından Hacı Ahmed ma‘rifetiyle sefînelere tahmîl ve her sefîne tahmîl olunduğu mikdâr zehâyirin hüccetlerin olup sefîne reislerine teslîm ve sefîne reisleri ile mahalline irsâl eylediklerinde teslîmlerine kabz edenlerden temessükler getirip mübâşire vermeyip gönderdikleri zehâyir tamâmen teslîm olunduğu ve olunmadığı ma‘lûm olmayıp noksânları var ise tefahhus ve teslîm olunanı kabz eden aldıkları temessük yoklanıp ibrâz ve mahalline kayd olunmak için mübâşire teslîm olunmak bâbında i‘lâm eylediği ecilden, imdi mübâşirin yedine verdikleri hüccet mûcebince reislerin getirdikleri zehâyir kabzına me’mûr olanlar temessükleri var ise fîhâ ve illâ kusûrları ve noksânları şer‘ ve kānûn üzre reislerden tahsîl olunmak fermanım olmuşdur. Buyurdum ki hükm-i şerîfimle vardıkda bu bâbda sâdır olan emrim üzre amel edip vech-i meşrûh üzre mübâşir-i mezbûrun ma‘rifetiyle reislere teslîm ve mahalline irsâl olunan zehâyir varıp mahalline tamâmen teslîm olunduğuna reislerin yedlerinde temessükleri yoklanıp tamâmen teslîm olunmayıp noksânları var ise verdikleri hüccet-i şer‘iyye mûcebince noksânları tefahhus ve tecessüs-i mîrî zehâyir olmağla bir nesne zâyi‘ ve telef olunmayıp tamâmen tesellümleri olunanları temessükleri mahalline kayd olunmak için mübâşire teslîm olunup mîrî zehâyir izâ‘at olunmakdan ihtirâz eyleyesiz şöyle bilesiz, alâmet-i şerîfe i‘timâd kılasız. Tahrîren fi’l-yevmi aşer min şehri Receb sene seb‘a ve tis‘în ve elf. Sahrâ-yı Edirne.