Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 519 Hüküm no: 389 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Güzelhisarlı Ahmed Efendi varislerinin miras davasında sulh olduğu Mahmiye-i İstanbul’da Sofular mahallesi ahâlîsinden olup mahrûse-i Bursa kazâsından ma‘zûlen Seddülbahr nâm mevzi‘de bundan akdem vefât eden Güzelhisarî Ahmed Efendi b. Mustafa’nın verâseti zevce-i metrûkesi umdetü’l-muhadderât Rukiye Hanım bt. el-merhûm Mahmud Efendi b. ( ) ile kebîre kızı Rahime Hatun ve li-ebeveyn ibn-i ammi el-Hâc Halil’in sagīr oğulları işbu İbrahim ile medîne-i Güzelhisar’da sâkin Ahmed’e münhasıra ve tashîh meselesi on altı sehmden olmağla sihâm-ı mezbûrenin iki sehmi zevcesi mezbûre Rukiye Hatun’a ve sekiz sehmi mezbûre Rahime’ye ve bâkī altı sehmin üçer sehmi mezbûrân İbrahim ve Ahmed’den her birine isâbeti tahakkukundan sonra sagīrân-ı mezbûrânın tesviye-i emrlerine kıbel-i şer‘den hâlâ vasî nasb olunan Mustafa Efendi b. Mehmed mahfil-i kazâda mezbûretân Rukiye ve Rahime taraflarından husûs-ı âti’l-beyânda müseccel vekîlleri işbu hâfızü’l-kitâb Hasan Efendi b. Abdullah muvâcehesinde [95a] bi’l-vesâye üzerine ikrâr ve takrîr-i kelâm edip müvekkiletân-ı mezbûretân defter-i kassâmdan hâric tereke-i müteveffâ-yı mezbûrdan mecmû‘ üç yüz guruş kıymetli kırk cild ma‘lûmü’l-esâmî kitâb ve bir sırt samur kürk ve bir kakum kürkünü ketm ü ihfâ edip mîrâsa idhâl etmemekle eşyâ-i mezbûreen ber-tashîh-i mezbûr üzere sagīrân-ı mezbûrâna isâbet eden altı sehm-i şâyi‘alarını müvekkiletân-ı mezbûretândan da‘vâ ve taleb ettiğimde onlar dahi inkâr etmekle benim beyyinem olmadığı ecilden mezbûretâna yemîn teklîf olundukda onlar dahi yemîn etmek sadedinde iken muslihûn tavassut edip eşyâ-i mezbûre esmânından beni dokuz bin yedi yüz doksan sağ akçe üzerine inşâ-i akd-i sulh ettiklerinde sulh-ı mezbûr sagīrler hakkında nef‘-i mahz olmağla ben dahi sulh-ı mezbûru kabûl ve bedel-i sulh olan meblağ-ı merkūm dokuz bin yedi yüz doksan sağ [akçe] ile ba‘de ihrâci’l-mesârif defter-i kassâm-ı askerî nâtık olduğu üzere taksîm içün bâkī kalan otuz yedi bin sekiz yüz doksan bir akçeden sagīrân-ı mezbûrâna isâbet eden on dört bin altı yüz on akçe ki cem‘an yirmi dört bin sağ akçesiyi vekîl-i merkūm Hasan Efendi yedinden tamâmen ahz u kabz eyledim meblağ-ı mecmû‘-ı merkūmdan yedlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb-şüd. Fî 16 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Osman Efendi b. Ahmed, eş-Şeyh Mehmed Efendi b. eş-Şeyh Mehmed, Hüseyin Efendi b. Mehmed, Musa Efendi b. Mehmed, Çukadâr el-Hâc Süleyman, Muhzır Ahmed Çelebi b. Nezir.