Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 520 Hüküm no: 390 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Âlime Hatun’un çocuklarına babaları Mehmed Efendi’nin vasi tayin edildiği Mahmiye-i İstanbul’da Çıkrıkçı Kemâl mahallesinde sâkine <>lerinden olup Vilâyet-i Rumeli’nde Yenişehir kazâsında müsâferet vechi üzere sâkine iken bundan akdem vefât eden Âlime Hatun bt. Ahmed Efendi’nin sagīre kızları Fâtıma ve Emetullah’ın tesviye-i emrlerine kıbel-i şer‘den bir vasî nasb ü ta‘yîn olunması lâzım olmağın mahmûdü’l-hâl olup her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârları ile lede’ş-şer‘ zâhir ve mütehakkik olan sagīretân-ı mezbûretânın babaları Mehmed Efendi b. Abdurrahman’ı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīretân-ı mezbûretânın tesviye-i emrlerine vakt-i rüşd [ü] sedâdlarına değin mezbûr Mehmed Efendi’yi vasî nasb ü ta‘yîn eyledikde ol dahi vesâyet-i mezbûreyi ba‘de’l-kabûl ve merâsimini edâya müte‘ahhid oldukdan sonra vasiyy-i mezbûr Mehmed Efendi meclis-i şer‘de takrîr-i kelâm edip sagīretân-ı mezbûretânın vâlideleri müteveffât-ı mezbûre Âlime Hatun’dan müntakil mülklerinden kıbel-i şer‘den her birine kadr-ı ma‘rûf nafaka farz ve takdîr olunması matlûbumdur dedikde hâkim-i mûmâ-ileyh efendi hazretleri dahi sagīretân-ı mezbûretânın mallarından vasiyy-i mezbûr talebiyle her birine yevmî ikişer paradan cem‘an dört [para] nafaka farz ve takdîr edip meblağ-ı mefrûz-ı mezbûru sagīretân-ı mezbûretânın <> nafaka ve kisvelerine ve sâir hevâic-i zarûre[lerine] harc ü sarfa ve lede’l-iktizâ istidâneye ve inde’z-zafer rücû‘a vasiyy-i mezbûra izin vermeğin mâ-vaka‘a bi’t-taleb kayd-şüd. Hurrire fî 16 min-Rebî‘ülâhir sene 1110. Şuhûdü’l-hâl: Fahrü’l-akrân Aynacı Osman Ağa b. Ali, Mustafa Efendi b. Ahmed, Saraç Abdi b. Mustafa, Hüseyin b. Mehmed, Mustafa b. Ahmed, Nasuh b. Abdullah.