Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 521 Hüküm no: 391 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in varislerinden Ahmed Beşe’nin terekeden bazı eşyaları gizlediği iddiasıyla Hatice Hanım’a açtığı davayı ispat edemediği Husûs-ı âti’l-beyânın mahallinde istimâ‘ ve ketb ü tahrîri içün savb-ı şer‘den bi’t-taleb me’zûnen irsâl olunan Süleyman Efendi b. el-merhûm Mehmed Efendi mahmiye-i İstanbul’da Mimârayas mahallesi ahâlîsinden olup bundan akdem vefât eden el-Hâc İbrahim b. Eyüb’ün menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevcesi Hadîce bt. Abdullah ile li-ebin karındaşı Ahmed Beşe’ye münhasıra <> ve tashîh meselesi dört sehmden olup sihâm-ı mezbûrenin bir sehmi zevcesi mezbûreye ve bâkī üç sehmi mezbûr Ahmed Beşe’ye isâbeti tahakkukundan sonra mezbûr Ahmed Beşe meclis-i ma‘kūd-ı mezbûrda zâtı hâlâ zevci Ahmed Odabaşı b. Ali ve Mehmed Çelebi b. Ali ta‘rîfleriyle mu‘arrefe olan mezbûre Hadîce mahzarında üzerine da‘vâ ve takrîr-i kelâm edip müteveffâ-yı mezbûrun terekesinden mecmû‘u iki yüz guruş kıymetli bir meşin kaplı Mushaf ve bir yeşil çukaya kaplı samur nâfesi kürk ve iki sîm kılıç ve iki …? tüfenk ve bir orta keçesi ve bir yan keçesi ve bir güğüm ve bir mücevher kuşağı ketm ü ihfâ edip mîrâsa idhâlden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden ızhâr-ı acz ile istihlâf etmeğin zikr olunan eşyâyı ketm ü ihfâ etmeyip ve üzerine bir vechile redd ü damân lâzım olmadığına mezbûre Hadîce’ye yemîn teklîf ol dahi ber-vefki’l-mesûl half billâhi’l-aliyyi’l-a‘lâ etmeğin mûcebiyle mezbûre Hadîce Hatun ile bilâ-beyyine mu‘ârazadan mezbûr Ali (Ahmed) Beşe’yi men‘ <> olunmağın vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Ahmed Çelebi b. Süleyman ve İbrahim b. Hasan ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd-şüd. Hurrire fî 24 min-Rebî‘ülâhir sene 1110 Şuhûdü’l-hâl: Hasan Ağa b. Ahmed, Mehmed Çelebi b. Mustafa, Ali Çelebi b. Mehmed, Şatır Ahmed Çelebi b. Ali, Ali Beşe b. Veli.