Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 636 Hüküm no: 791 Orijinal metin no: [144a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çilingirci olmayanlara çilingir dükkânı açtırılmaması fermanı Düstûr-ı mükerrem, müşîr-i müfahham, nizâmü’l-âlem, müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-iclâl, müşeyyidü’l-erkâni’s-sa‘âdeti ve’l-iclâl, el-mahfûfu bi sunûfi avâtıfi’l-meliki’l-a‘lâ rikâb-ı hümâyûnumda sadâret-i uzmâ ve vekâlet-i kübrâ kāimmakāmım olan vezîrim Receb Paşa -edâmallâhu te‘âlâ iclâlehû- ve akzâ kuzâti’l-müslimîn ve evlâ vülâti’l-muvahhidîn, ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyetil-meliki’l-Mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki mahrûse-i İstanbul’da vâki‘ çilingirler tâifesi Ordu-yı hümâyûnuma arzuhâl sunup bunların ihtiyârları ve kethüdâları Mehmed nâm kimesnenin izni yoğiken üstâda varıp hizmet edip başka çıkmayan hâm-dest kimesneler hâricden gelip bunların san‘atları umûruna karışıp Galata’da ve ba‘zı yerlerde dükkân açıp küllî gadr ve ihtilâl verdiklerin bildirip ol bâbda hükm-i hümâyûnum recâ eyledikleri ecilden şer‘ile görülüp men‘ ü def‘ olunmak emrim olmuşdur. Buyurdum ki ( ) vusûl buldukda bu bâbda sâdır olan emrim üzre amel edip dahi ihzâr-ı husamâ kılıp mukaddemâ bir def‘a şer‘ile görülüp fasl olunmayan husûsları tamâm hak üzre tefahhus edip göresin arz olunduğu üzre ise ol bâbda muktezâ-yı şer‘-i kavîmle amel edip dahi ol vechile üstâda varıp hizmet edip başka çıkmayan kimesneleri bunların san‘atları umûruna karışdırmayıp men‘ ü def‘ eyleyesin husûs-ı mezbûr için bir dahi emrim varmalı eylemeyesin şöyle bilesin alâmet-i şerîfe i‘timâd kılasın. Tahrîren fî evâsıtı şehri Cumâdelâhire li sene seb‘a ve seb‘în ve elf. Der sahrâ-yı Edirne.