Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 534 Hüküm no: 403 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Galatalı Mehmed Çavuş’un hanımı Ayşe’ye olan borcunun terekeden ödenmesi Husûs-ı âti’l-beyânın mahallinde istimâ‘ [ve] tahrîri iltimâs olunmağın bu dahi mahmiye-i İstanbul’da Havuzbaşı mahallesi sâkinlerinden Âişe Hatun ibneti’l-merhûm el-Hâc Mehmed Çavuş’un menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî olundukda mahalle-i mezbûre sâkinlerinden iken bundan akdem vefât eden Galatalı Mehmed Çavuş b. Abdurrahman b. Abdülmennan’ın verâseti zevce-i metrûke-i menkûhası mezbûre Âişe Hatun’a ve kebîre kızları Fâtıma ve Afife’ye ve sagīre kızı Hadîce’ye ve sagīr oğlu İbrahim ile kebîr oğlu İsmail’e münhasıra olduğu şer‘an zâhir ve mütebeyyen oldukdan sonra zâtı mahalle-i mezbûre ahâlîsinden İmâm Veliyüddin Efendi b. Ahmed ve Çorbacı İbrahim Ağa b. Abdullah ta‘rîfleriyle mu‘arrefe olan işbu râfi‘atü’l-kitâb mezbûre Âişe Hatun meclis-i ma‘kūd-ı mezkûrda müteveffâ-yı mezbûrun sulbiye kebîre kızı olmağla terekesine vâzı‘atü’l-yed olup zâtı mu‘arrifân-ı mezbûrân ta‘rîfleri ile mu‘arrefe olan mezbûre Afife mahzarında üzerine da‘vâ ve takrîr-i kelâm edip zevcim müteveffâ-yı mezbûr Galatalı Mehmed Çavuş b. Abdurrahman b. Abdurrahman [Abdülmennan] sene tis‘a ve mi’e ve elf Zilhiccesi gurresinde malımdan bin Efrencî altın ikrâz ve teslîm ol dahi ber-vech-i muharrer ikrâz ve kabz ve kendi mesârifine sarfla istihlâk eylediğinden sonra fevtinden iki ay mukaddem hâl-i kemâl-i sıhhatinde ber-vech-i muharrer bana cihet-i mezbûreden bin Efrencî altın zimmetinde lâzımü’l-edâ deyni olduğunu mahzar-ı Müslimînde [98a] ikrâr ve işhâd edip kable’l-edâ fevt olmağın hâlâ terekesinden taleb ederim, merkūme Afife’ye suâl olunsun dedikde gıbbe’s-suâl mezbûre Afife cevâbında fi’l-hakīka babası müteveffâ-yı mezbûrun terekesine vâzı‘atü’l-yed olduğunu ikrâr lâkin deyn-i mezbûru inkâr edicek müdde‘iye-i mezbûre Âişe Hatun’dan müdde‘âsına beyyine taleb olundukda udûl-ı ahrâr-ı ricâl-i Müslimînden ve mahmiye-i mezbûre mahallâtından Kesmekaya kurbünde Hamamcı [Muhyi]ddin mahallesinde sâkin Mehmed Ağa b. Abdurrahman ve Ramazan Çelebi b. Ahmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Galatalı Mehmed Çavuş b. Abdurrahman b. Abdülmennan zevcesi müdde‘iye-i mezbûre Âişe Hatun yedinden târîh-i mezkûrda istikrâz ve kabz ü istihlâk eylediği bin Efrencî altın zimmetinde lâzımü’l-edâ deyni olduğunu fevtinden iki ay mukaddem hâl-i kemâl-i sıhhatinde bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fî 17 min-Rebî‘i’l-âhir li-sene aşer ve mi’e ve elf. Şuhûdü’l-hâl: Mehmed Efendi b. Ahmed, el-Hâc Yusuf b. Ali, Ahmed Ağa b. Abdullah, el-Hâc Süleyman b. Ali, Nasuh b. Yusuf, Hasan Çelebi b. Abdullah, Mehmed Beşe b. Ahmed