Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 535 Hüküm no: 404 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Galatalı Mehmed Çavuş’un hanımı Ayşe’ye olan mehir borcunun terekeden ödenmesi Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Mevlânâ İmâmzâde Mehmed Efendi b. Ahmed Efendi mahmiye-i İstanbul’da Çavuşbaşı mahallesi sâkinelerinden Âişe Hatun bt. el-Hâc Mehmed Çavuş’un menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahalle-i mezbûrede sâkin iken bundan akdem vefât eden Galatalı Mehmed Çavuş b. Abdurrahman b. Abdülmennan’ın verâseti zevce-i metrûke-i menkûhası mezbûre Âişe Hatun ile sulbiye kebîre kızları Fâtıma ve Afife’ye ve sagīre kızı Hadîce’ye ve sulbî oğlu İbrahim ve kebîr oğlu İsmail’e münhasıra olduğu şer‘an zâhir ve mütebeyyen oldukdan sonra zâtı Hüseyin Çelebi b. Hasan ve Mehmed Beşe b. Ahmed ta‘rîfleriyle mu‘arrefe olan zevcesi işbu sâhibetü’l-kitâb mezbûre Âişe Hatun meclis-i ma‘kūd-ı mezbûrda kebîre kızları olmağla müteveffâ-yı mezbûrun terekesine vâzı‘ayi’l-yed olup zâtları ta‘rîfât-ı mezbûrât ma‘rifetleriyle mu‘arrefe olan mezbûretân Fâtıma ve Afife mahzarlarında üzerlerine da‘vâ ve takrîr-i kelâm edip zevcim müteveffâ-yı mezbûr Galatalı Mehmed Çavuş b. Abdurrahman b. Abdülmennan zimmetinde mütekarrer ve ma‘kūdun-aleyh bin kıt‘a esedî guruş mehr-i müeccel hakkım olup hattâ müteveffâ-yı mezbûr fevtinden iki ay mukaddem hâl-i kemâl-i sıhhatinde mahzar-ı Müslimîn’de ikrâr ve işhâd edip kable’l-edâ fevt olmağın hâlâ terekesinden taleb ederim suâl olunsun dedikde gıbbe’s-suâl mezbûretân Fâtıma ve Afife cevâblarında fi’l-vâki‘ müteveffâ-yı mezbûrun terekesine ber-vech-i muharrer vâzı‘atü’l-yed olduklarını ikrâr lâkin mehr-i mezkûru inkâr eylediklerinde mezbûre Âişe Hatun’dan sıdk-ı makāline beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlîsinden İmâm Veliyüddin Efendi b. Ahmed ve Tahtaminare mahallesinde sâkin Mehmed Beşe b. Ahmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Galatalı Mehmed Çavuş b. Abdurrahman b. Abdülmennan’ın zevcesi işbu mezbûre Âişe Hatun’a zimmetinde mütekarrer ve ma‘kūdun-aleyh bin guruş mehr-i müeccel deyni olduğunu fevtinden iki ay mukaddem hâl-i kemâl-i sıhhatinde bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Abdullah ve muhzır Hasan Çelebi b. Abdullah ile meclis-i şer‘a gelip vukū‘u üzere inhâ ve takrîr etmeğin kayd şüd. Hurrire min-şehri’l-mezbûre. Şuhûdü’l-hâl: Durmuş Beşe b. Ömer, Hüseyin Çelebi b. Hasan, Berber el-Hâc Süleyman b. Receb, el-Hâc Yusuf b. Ali, Mustafa Çelebi b. Mehmed, Ramazan Çelebi b. Ahmed