Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 536 Hüküm no: 405 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun’dan alacağı olan Zeynep Hanım’ın parayı varislerden aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Emin Sinan mahallesinde sâkin fahrü’l-akrân Osman Bey b. el-merhûm Mustafa Paşa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Pîrî Ağa mahallesinde sâkine iken bundan akdem vefât eden Âişe Hatun ibneti’l-merhûm Abdurrahman Paşa’nın verâseti zevc-i metrûku Mehmed Ağa b. Abdurrahman ile sagīre kızı Safiye Hanım’a ve li-ebeveyn kız karındaşı Zeyneb Hanım’a münhasıra olup kable’l-kısmet sagīre-i mezbûre dahi vefât edip verâseti babası mezbûr Mehmed Ağa’ya münhasıra olup kable’l-kısmet mezbûr Mehmed Ağa dahi vefât edip verâseti vâlidesi Râbia Hatun bt. Hamza’ya münhasıra ve tashîh-i meselesi bi-hükmi’l-münâsaha dört sehmden olmağla sihâm-ı mezbûrenin bir sehmi mezbûre Zeyneb Hanım’a ve selâse-i erbâ‘ı vâlidesi mezbûre Râbia Hatun’a isâbeti tahakkukundan sonra mezbûre Zeyneb Hanım tarafından husûs-ı âti’l-beyânda müseccel vekîli olan bâ‘isü’l-kitâb Hasan Bey b. Salih meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan mezbûre Râbia Hatun mahzarında bi’l-vekâle ikrâr ve takrîr-i kelâm edip müteveffâ-yı mezbûr Mehmed Ağa’nın imzâ ve hatmiyle mümzâ ve mahtûm işbu deyn temessükü nâtık olduğu üzere müvekkile-i mezbûre Zeyneb Hanım’ın müteveffâ-yı mezbûr zimmetinde cihet-i mezbûreden olan iki yüz elli guruş [98b] hakkını, terekesine vaz‘-ı yed eden vâlidesi mezbûre Râbia Hatun’dan taleb ve da‘vâ eyledikde müvekkilem mûmâ-ileyhin iddi‘âsı olan meblağ-ı merkūmun doksan beş guruşundan fâriğâ olmak üzere muslihûn tavassutu ile mezbûre Râbia Hatun ile yüz elli beş guruşa sulh ettiklerinde ben dahi sulh-ı mezbûru kabûl ve bedel-i sulh olan meblağ-ı merkūm yüz elli beş guruşun yüz yirmi beş guruşunu ba‘dehû mezbûre Râbia Hatun yedinden alıp kabz edip ve meblağ-ı bâkī otuz guruş mukābelesinde medîne-i İznikmid’de Topyeri demekle ma‘rûf mevzi‘de vâki‘ beyne’l-ahâlî ve’l-cîrân ma‘lûmü’l-hudûd ve çiftlik ta‘bîr olunur mülk menzilden evvelâ vefât eden mezbûre Âişe Hanım’dan tashîh-i mezbûr üzere mezbûre Râbia Hatun’a isâbet eden üç sehmi bedel-i sulh-ı mezbûr bâkī kalan otuz guruşa takas ve ben dahi mukāssa ve kabûl eyledim, mezbûre Râbia Hatun mebî‘-i mezbûru kabzına müvekkilem mûmâ-ileyhâyı taslît eyledi ba‘de’l-yevm husûs-ı merkūma müte‘allıka âmme-i da‘vâdan her biri âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ba‘dehû ma‘an ba‘s olunan Ahmed Çelebi b. Süleyman ve Mustafa Çelebi b. Mehmed meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Hurrire fî 14 min-Rebî‘i’l-âhir li-sene aşer ve mi’e ve elf. Şuhûdü’l-hâl: Mehmed Efendi b. Süleyman, Ebubekir Ağa b. Mehmed, Mehmed Ağa b. İbrahim, İsmail Ağa b. Mustafa, Hasan Ağa b. Abdullah, Mustafa Ağa b. Abdullah