Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 537 Hüküm no: 406 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah’ın vefatıyla çocuklarına nafaka tayin edilmesi Mahmiye-i İstanbul’da Serv[i] mahallesinde sâkin iken bundan akdem vefât eden el-Hâc Yusuf b. Abdullah’ın sulbî sagīr oğlu Mustafa ve sagīre kızı Havva’nın tesviye-i umûruna vasiye-i mansûbeleri ve vâlideleri olup zâtı ta‘rîf-i şer‘î ile mu‘arrefe olan hâzınaları işbu hâfızatü’l-kitâb Safiye Hatun bt. Abdullah meclis-i şer‘de takrîr-i kelâm ve ta‘bîr ani’l-merâm edip vasiyeleri olduğum sagīrân-ı mezbûrân Mustafa ve Havva’nın nafaka ve kisveye eşedd-i ihtiyâc ile muhtâclar olduğunu babaları müteveffâ-yı mezbûrdan müntakil hisse-i irsiyelerinden kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka idiği lede’ş-şer‘i’ş-şerîf zâhir ve mukarrer olmağla hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri mal-ı müntakillerinden her birine yevmî ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûr yevmî ikişer parayı sagīrân-ı mezbûrânın levâzım-ı zarûriyelerine harc ü sarfa inde’z-zarûre istidâne ve lede’z-zafer rücû‘a vasiye-i mezbûra izin birle mâ-vaka‘a bi’t-taleb kayd şüd. Hurrire gurreti min-Rebî‘ülâhir sene 1110. Şuhûdü’l-hâl: Mu‘îd Mustafa Efendi b. Mehmed, Abdülmuti Efendi, Ömer Efendi b. Mustafa, Süleyman Çelebi b. Mehmed