Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 637 Hüküm no: 792 Orijinal metin no: [144a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cizye defterinde kaydı bulunmayan Behram’dan Divriği cizyesi alınmaması Düstûr-ı mükerrem, müşîr-i müfahham, nizâmü’l-âlem, müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-sa‘âdeti ve’l-iclâl, el-mahfûfu bi sunûfi’l-avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmım olan vezîrim ( ) Paşa -edâmallâhu te‘âlâ iclâlehû- akzâ kuzâti’l-müslimîn, evlâ vülâti’l-muvahhidîn, huccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Behram nâm zimmî Dersa‘âdet’ime arzuhâl edip babam ve kendim İstanbul’da doğup ve büyüyüp dahl olunmak îcâb etmez iken Divriği re‘âyâsının ceddin Divriği’de sâkin olmuşdur deyû dahl, bizim ile ma‘an harâc ver deyû hilâf-ı şer‘-i şerîf yirmi dokuz guruşum alıp ve on guruşum dahi taleb edip ziyâde zulm ve te‘addî eylediğin bildirip hâlâ İstanbul’da mukayyed olduğu defter-i kefereye cizyesini bir def‘a verdikden sonra tekrâr Divriği tarafında cizye talebiyle rencîde olunmamak bâbında emr-i şerîfim recâ eylediği ecilden Hazîne-i âmire’mde mahfûz olan ziyâde cizye defterlerine nazar olundukda zikr olunan Behzad zimmî nefs-i Divriği re‘âyâsın tahrîr eden Selâm ağası Ahmed’in tahrîr eylediği defterde kaydı yoktur deyû derkenâr olundukda imdi hilâf-ı defter rencîde olunmaya deyû fermânım olmuşdur. Buyurdum ki hükm-i şerîfimle vardıkda bu bâbda sâdır olan emrimle amel edip dahi tahrîr-i cedîd defterinde Divriği’de cizye hânesine kayd olunduğu kaydı bulunmamağla üzerine edâsı lâzım gelen cizyesi İstanbul’da kayıd olunup defter keferesiyle bir def‘a edâ ettikden sonra hilâf-ı kānûn ve defter tekrâr Divriği tarafından cizye talebiyle rencîde ve remîde ettirmeyesin şöyle bilesin alâmet-i şerîfe i‘timâd kılasın. Tahrîren fi’s-sânî aşer min Zilhicceti’ş-şerîfe sene [10]97. Be makām-ı sahrâ-yı Edirne.