Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 538 Hüküm no: 407 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin vefatıyla oğluna nafaka tayin edildiği Mahmiye-i İstanbul’da Akseki mahallesinde sâkine iken bundan akdem vefât eden Mustafa b. Ali’nin sagīr oğlu Mehmed’in tesviye-i umûruna kıbel-i şer‘den vasî nasb ü ta‘yîn olunmak lâzım olmağın mahmûdü’l-hâl olup her vechile vesâyet uhdesinden gelmeye kādir idiği zeyl-i vesîkada muharrerü’l-esâmî Müslimîn ihbârları ile lede’ş-şer‘i’ş-şerîf zâhir olmağın sagīr-i mezbûrun min-kıbeli’l-ümm ceddi Ahmed Çelebi b. (°) hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri vasî nasb ü ta‘yîn buyurup ol dahi ba‘de’l-kabûl mezbûr Ahmed Çelebi meclis-i şer‘de takrîr-i kelâm edip vasîsi olduğum sagīr-i mezbûrun babası müteveffâ-yı mezbûrdan müntakil malından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i mûmâ-ileyh sagīr-i mezbûrun mal-ı müntakilinden târîh-i kitâbdan yevmî on sağ akçe nafaka farz ve takdîr buyurup meblağ-ı mefrûz-ı mezbûru levâzım-ı sagīr-i mezbûra harc ü sarfa ve lede’l-iktizâ istidâneye ve inde’z-zafer rücû‘a vasiyy-i mezbûra izin verilmeğin mâ-vaka‘a bi’t-taleb kayd şüd. Hurrire fî 16 min-Rebî‘ülâhir sene 1110. Şuhûdü’l-hâl: Fahrü’l-müderrisîni’l-kirâm Çukacızâde es-Seyyid Ahmed Efendi b. es-Seyyid Abdurrahman, es-Seyyid Abdurrahim Efendi b. mezbûr, Fahrü’l-eimme Rasûl Efendi b. Muharrem, Ebubekir Efendi b. Mehmed