Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 539 Hüküm no: 408 Orijinal metin no: [98b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emetullah Hatun’un kızına nafaka tayini Mahmiye-i İstanbul’da Sultan Selim kurbünde Koğacı Dede mahallesinde Osman Paşa odalarının birinde sâkine iken bundan akdem vefât eden Emetullah Hatun bt. Mehmed’in sadriye sagīre kızı Hanife’nin tesviye-i umûruna kıbel-i şer‘den mansûb vasîsi işbu hâfızü’l-kitâb el-Hâc Mehmed b. Osman meclis-i şer‘de bi’l-vesâye ikrâr ve takrîr-i kelâm edip vasîsi olduğum sagīre-i mezbûrenin nafaka ve kisveye ihtiyâcı olmağla vâlidesi müteveffât-ı mezbûrdan intikāl eden malından ve vakıf menzil icâresinden kadr-ı kifâye nafaka-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbık olup hâkim-i muvakkı‘-ı sadr-ı kitâb efendi hazretleri mal-ı müntakilinden ve vakıf menzil icâresinden târîh-i kitâbdan yevmî ikişer para nafaka ve kisve-bahâ [99a] farz ve takdîr buyurup meblağ-ı mefrûz-ı mezkûru levâzım-ı sagīre-i mezbûra harc ü sarfa ve inde’z-zarûret istidâneye ve lede’z-zafer malına rücû‘a vasiyy-i mezbûra izin vermeğin mâ-vaka‘a kayd şüd. Hurrire fî gurre-i Rebî‘i’l-evvel li-sene aşer ve mi’e ve elf. Şuhûdü’l-hâl: Mahmud Efendi b. Mustafa, Hüseyin Çelebi b. Osman, Ali Çelebi b. Mehmed, Süleyman Çelebi b. Mehmed, Hacı Hasan b. Abdullah