Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 539 Hüküm no: 409 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçıbaşı Ali’nin hayatta iken cariyesi Gülistan’ı azat ettiği Mahmiye-i İstanbul’da Altıboğça mahallesi ahâlîsinden olup Mısr-ı Kāhire’de bundan akdem vefât eden Aşçıbaşı el-Hâc Ali b. Hüseyin’in verâseti zevceteyn-i metrûkeyni Havva Hatun bt. Mehmed ve Âişe Hatun bt. Abdullah ile sulbî kebîr oğlu Mehmed ve sulbiye sagīre kızı Emetullah’a münhasıra olduğu şer‘an zâhir ve mütehakkık oldukdan sonra müteveffâ-yı mezbûra rıkkını mu‘terife işbu uzun boylu, açık kaşlı, elâ gözlü, Gürciyyü’l-asl, Müslimetü’l-millet hâfızatü’l-kitâb Gülistan bt. Abdullah meclis-i şer‘de sagīre-i mezbûre Emetullah’ın ammi ve savb-ı şer‘den mansûb vasîsi el-Hâc Ömer b. Hasan ve mezbûretân Havva ve Hadîce nâm hatunlar mahzarlarında üzerlerine da‘vâ ve takrîr-i kelâm edip seyyidim müteveffâ-yı merkūm Aşçıbaşı el-Hâc Ali b. Hüseyin târîh-i kitâbdan yedi sene mukaddem Kadıçeşmesi kurbünde vâki‘ ...? bir sakfdan düşüp mecrûh olduğumda bi-emrillâhi te‘âlâ mübtelâ olduğum cerhden ifâkat bulursam benim içün câriye-i memlûkem olan Gülistan malımdan âzâd olsun deyü huzûr-ı Müslimînde ikrâr ve işhâd ettiğinden sonra cerh-i merkūmdan kendüye ifâkat gelip kemâl-i sıhhat bulmağın ben sâir harâir-i asliyât gibi hürre olmuş iken vasiyy-i merkūm ile mezbûretân Havva ve Hadîce bana rakīka olup terekeden olmak üzere bi-gayr-ı hakkın vaz‘-ı yed eder suâl olunup sebîlim tahliye olunmak matlûbumdur dedikde gıbbe’s-suâl ve’l-inkâr müdde‘iye-i merkūmeden müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Acem Ağa mahallesi sükkânından Mehmed Efendi b. Mahmud ile Ayasofya-i kebîr mahallesinde sâkine Emine Hatun bt. Halil ve Altıboğça mahallesinde sâkine İsmihan Hatun bt. Abdullah nâm hatunlar li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr Aşçıbaşı el-Hâc Ali b. Hasan târîh-i kitâbdan yedi sene mukaddem Kadıçeşmesi kurbünde vâki‘ ...? bir sakfdan düşüp mecrûh olduğumda mübtelâ olduğum cerhden ifâkat bulursam işbu mevsûfe-i mezbûre içün câriye-i memlûkem olan Gülistan malımdan âzâd olsun deyü bizim huzûrumuzda ikrâr ve bizi işhâd ettikden sonra cerh-i merkūmdan kendüye ifâkat gelip ber’-i tâm bulup mezbûre Gülistan sâir harâir-i asliyât gibi hürre olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mevsûfe-i mezbûrenin sebîli tahliye olunmağın mâ-vaka‘a bi’t-taleb kayd şüd. Hurrire fî 20 min-Rebî‘i’l-âhir sene aşer ve mi’e ve elf. Şuhûdü’l-hâl: Mehmed Efendi b. Mehmed el-imâm, Hasan Çelebi b. Abdullah, İbrahim Çelebi b. Mehmed, İbrahim Çelebi b. Ahmed, Çukadâr el-Hâc Süleyman