Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 540 Hüküm no: 410 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babası Osman Beşe’den küçük kızı Ayşe’ye kalan ev harap olduğundan satılmasına izin verildiği Mahmiye-i İstanbul’da Çelebioğlu mahallesinde sâkin iken bundan akdem vefât eden Osman Beşe b. İbrahim’in sagīre kızı Âişe’nin vâlidesi ve vasiye-i mansûbesi bâ‘isetü’l-kitâb Havva Hatun bt. Mahmud mahfil-i kazâda takrîr-i kelâm edip mahalle-i mezbûrede vâki‘ bir tarafdan Fâtıma Hanım menzili ve bir tarafdan Yu[suf] Paşa Hanı ve bir tarafdan Kebabcı Ali menzili ve bir tarafdan tarîk-i âm ile mahdûd Dâye Hatun Vakfı’ndan icâreteyn-i ma‘lûmeteyn ile müteveffâ-yı mezbûrun ile’l-vefât tasarrufunda olup ba‘de vefâtihî kızı sagīre-i mezbûreye intikāl eden nısf menzil harâba müşrif olup hâsılı harcına vefâ etmediğinden mâ‘adâ icâre-i müeccelesi cânib-i vakfa edâya sagīre-i mezbûrenin malının vüs‘ati olmamağla menzil-i mezbûr ma‘rifet-i mütevellî ve bedel-i misli ile âhara ferâğ olunup bedel-i ferâğ istirbâh olunmak sagīre-i mezbûre hakkında nef‘-i mahz olmağın vech-i muharrer üzere âhara ferâğa kıbel-i şer‘den izin taleb ederim dedikde vasiye-i mezbûrenin kelimât-ı meşrûhası vâkı‘a mutâbık idiği mahalle-i mezbûre ahâlîsinden İbrahim Çelebi b. Mustafa ve el-Hâc Süleyman b. Abdullah ve Mehmed Çelebi b. Ahmed haberleri ile lede’ş-şer‘ zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri zikr olunan nısf menzili ma‘rifet-i mütevellî ile ve bedel-i misli ile âhara ferâğa ve tefvîze vasiye-i mezbûra izin verilmeğin mâ-vaka‘a bi’t-taleb kayd şüd. Hurrire fî 8 min-şehri Rebî‘ülâhir sene 1110. Şuhûdü’l-hâl: Uşşâkī Mehmed Efendi, İbrahim Çelebi b. Mustafa, Ahmed Çelebi b. Süleyman, İbrahim Çelebi b. Mehmed, Süleyman Beşe b. Abdullah